文學的肥底─台灣褒歌 (台語文)
佇(在)過去的生活經驗內底，相信大多數人攏有即款的感覺，著是台灣話(前身是閩南語)是粗俗的、無水準的。伊是一種方言、是無文字的、袂(be7)凍用來創作的，所以台語是無文學作品等…。尤其自細漢開始，佇學習過程中間，教育機關從來毋捌(m7-bat4不曾)有台語文的教學，嘛更加毋捌讀過台語文的文章，所以潛意識內底，感覺台語若用來凊采(隨便)講講，猶閣(iau1-kho1還可)會通，但是若卜(要)成做文學作品，就「阿婆生囝─誠拚咧」。台語無啥乜(什麼)文學作品，這是一般人學習認知無夠，所產生的誤解。
其實佇西元1566年(明．嘉靖45年)，咱的祖先就已經有用台語文創作「荔鏡記」的劇本，即個劇本屬於南管的戲文，內容描寫陳三、五娘的愛情故事。另外有男女對唱的七字仔─褒歌、歌仔戲戲文、布袋戲戲文、皮影戲戲文、一千四百外種的歌仔簿(比如：周成過台灣、運河奇案)、地方民謠(比如：南光調、花鼓調)、囡仔歌(比如：打馬膠、白鴒鷥)…。咱逶(ui3由)1566年的「荔鏡記」算起到今仔日(今天)，台語的民間文學總也共也嘛已經超過四百外冬(這是指漢人來講)。遮個(這些)台語民間文學，會使(可以)講是台灣現代文學的肥底。尤其男女對唱的「褒歌」「七字仔」是台灣歌詩、現代詩的活水。「南管戲文」是台灣戲劇、小說的源頭。佇本土化受重視的今仔日，滯(住)佇即塊土地的「台灣人」(指認同即塊土地的人)，袂(be7不能)使對遮個寶貴文化遺產，目珠(睭)放瞌瞌(kheh4閉著眼晴)，喙激恬恬(kik4-tiam7-tiam7嘴巴閉著)，頭殼內一片空白，若安爾(這樣)著枉費做一個有「文化」有「尊嚴」的台灣人。

「褒歌」佇民間嘛叫做「七字仔」、「山歌」、「閒仔歌」、「挽茶歌」等講法，是三百冬來長期流行在台灣民間各所在，表現男女感情的台語歌詩，伊是台語文學的源頭，亦(也)是本土文學的基礎。莫怪日據時代(1927年)，佇「台灣藝苑」即本刊物，著用「台灣國風」即個名詞，來稱呼遮個(這些)褒歌，以表示肯定、呵咾(讚美)褒歌生活化，通俗化、自然化、音樂性等文學價值。咱攏知影，佇中國文學內底，上古典的文學詩集，著是「詩經」，即本被稱呼做五經之一的經典「詩經」，伊的內容分做「風」、「雅」、「頌」，其中上蓋有文學價值的是十五「國風」的部份，是三千外年前流行佇中原地區的民間歌謠，逶(由ui3)遮個歌詩內底，會凍看著中原地區各所在的風土民情、男女思慕、悲喜等的情懷。共款的意思，「台灣國風」嘛是台灣民間的歌謠，描寫記錄台灣古早查甫、查某佇都市、莊跤(鄉下)勞動、山上落海夯(gia5扛)貨、田園種作、茶山挽茶，互相對答，來表現男女意愛、相思、悲喜佮台灣民情風俗的歌詩文學。

「台灣褒歌」的特色除了內容是描寫台灣「風土」佮「訴情」的歌詩以外，伊的形式固定是四句，叫做「四句聯」；每一句攏以七字來表現，叫做「七字仔」；每一句攏押韻，叫做「全鬥句」，另外用字相當的自由，毋(m7)免講求平仄、毋免講求對句，無受格律的限制，尤其表現出生活化、趣味化的風格，予人感覺足親切，遮個特色會使講比「詩經─國風」、「唐詩─絕句」無卡(較)輸。咱若對台灣早期的褒歌有深入的了解，對台灣本土文化著會有所喜愛。下面咱來介紹台灣文學上有代表性的「台灣褒歌」，予逐家作伙來鼻芳、分享。
半暝月娘 千里路途

半暝月娘入紗窗， 千里路途無嫌遠，
偏偏照我守空房， 見面親像蜜攪糖，
關窗將月緊緊送， 苦毋時鐘行倒轉，
送去隔壁照別人。 好話未講天先光。

門口一欉 為娘割吊
門口一欉相思叢， 為娘割吊桃花痟，
想思病落毋知人， 倒落床中直條條，
先生來看講無望， 朋友若來真見笑，
搭心來看好咚咚。 起來無枴徛袂椆。

娘心親像 蓮藕拍斷
娘心親像月光暝， 蓮藕拍斷會牽絲，
君心親像烏暗天， 菜瓜辿藤密密纏，
娘用真心對待汝， 中意入心難分離，
君像蜘蛛吐毒絲。 相好毋是一半年。

阮庴踮佇 一尾好魚
阮庴踮佇娘厝後， 一尾好魚毋食釣，
不時看娘咧探頭， 走到江中尾直搖，
情意總有九分九， 掠汝袂著予汝笑，
路邊相撞頭勾勾。 堅心做網拋甲著。

含笑拍莓 竹筍離塗
含笑拍莓大細蕊， 竹筍離塗目目柯，
鴨母落田雙跤開， 塗豆開花釘落沙，
我娘生緣免生嫷， 身邊無娘通倚帶，
八字有合拆袂開。 一心想死卡快活。

頂面所介紹的台灣國風攏總有十首，除了是「四句聯」、「七字仔」、「有鬥句」外，嘛充滿著文學、古典、生活、趣味佮民俗等多采多姿的特色，若親像百花盛開的花園，予人欣賞了感覺真心適嘛真爽快。嘛若親像電影一幕一幕的劇情，觀賞了後使人印象深刻，愈餾(liu7蒸)愈有味。嘛若親像一首交響樂，聽了後心靈感覺非常豐沛(phong1-phai3)、非常愉快。台語是文學性的語言，伊有八音七調，九個變調，伊不但古老、典雅、哲理，閣趣味。咱若卜佇台語文化的園地徛起，咱愛佇台灣文學的肥底─褒歌，來好好壅(ing3施)肥種作，予咱台灣文學會凍早一日出頭天，佇世界的文學參人有比並(phing7比較)。向望(希望)佇日後有機會，會凍將有代表性的「台灣國風」一首一首紹介予即塊島嶼的主人欣賞，逐家共同講「阿的話」，唱「土地的聲嗽」。

即本冊會凍順利來完成，我卜特別感謝劉庸英小姐佮蔡孟宗先生佇羅馬拼音的校對佮內容的編排、設計。(1999.12.20董峰政寫佇埔羌頭─永康)