囡仔歌─踏話頭(代序)

 踏話頭─母語若失聲，啥人是阿娘！             

    過去佇(ti⁷)台灣，統治者長期有意疏忽、壓制台灣即塊島嶼的方言(台語、客語、原住民語)，致使「受過北京語(俗稱國語)教育」的百姓，多數無法度用足流利的母語來發聲。另外目前佇學校受教育的「新新人類」，多數人已經變成是母語「失聲」的一代。回顧歷史，猶太人亡國兩千外冬，佇第二次世界大戰了後，才建立家己(ti⁷)的國家─以色列。但是以色列的百姓卻會當佇一夜之間，馬上佇怹(in¹)國內通行家己的母語。這主要的原因是過去亡國的期間，猶太人佇厝裡猶原用母語參子女交談；安歇日佇教會做禮拜的時，傳教士堅持用母語講(kang²)道、唱聖詩，所以猶太人將母語保存甲好勢溜溜(liu¹)。講著台灣，情形著完全無仝款囉，因為台灣才被日本異族殖民(sit⁸-bin⁵)五十冬(1895-1945)，被國民黨外來政權統治五十冬(1945-1996)，總也共也嘛才一百冬，結局台灣話煞來拋荒(pha¹-hng¹)去，強卜斷站、無氣脈，真是使人感慨萬分。為著無卜予母語來失落，人人愛來「搶救母語」，逐家做伙來走揣(chue⁷)阿娘的話，來聽土地的聲嗽，將母語佮日常生活相結合。

    客家人有一句俗語講：「甘願賣祖公產、毋願阿娘的話烏白掞(tan³)」，阮認為「搶救母語」、「走揣阿娘的話」上好的方式，是佇(ti⁷)厝裡傳唱台灣囡仔歌─童謠、唸謠，因為「囡仔歌」是母語的源頭，伊是有鬥(湊)句的文字、有節奏的聲音，這是上好的母語教育、上好的音樂教育、嘛是上好的本土文化教育，予(hoo⁷)咱的子弟自細漢着來鼻着「母語的奶芳」。

        「囡仔歌」佇族群文化的意義上來講，伊是老大人回想做囡仔時代無煩無惱一段有歌聲、有笑聲的記憶。對即碼的少年來講，佇歷史佮文化認知上，嘛有傳承的作用，簡單講伊是一個族群共同的聲嗽(sau³)。童謠的內容是古錐樸素、活潑心適，所以父母佮囡仔佇即款的趣味、好爽(sng²)的童謠中，建立了和諧、溫暖的親情。進一步講，遮个(cia¹-e⁵)童謠囡仔歌，內容是對(ui³)大自然佮土地來取材个，會使講天真浪漫、幻想豐富、心適趣味、押韻鬥句、韻律煞拍。佇成長的過程中，透過兒童純真的感情，唸唱著囡仔歌，佇無形中學著母語的腔口，呼吸(hoo¹-khip⁴)著母語的音樂節奏，體會著感情的流露，塑造了囡仔的鄉土性格佮對母語的感情。即款的感情，經由囡仔兄的唱聲佮笑聲，保存佇逐家心肝底、頭殼內，日後化作族群的心聲、台語文學的肥底。

    母語是對(ui³)嬰仔出世開始學起个，是佇生活中運用个，毋(m⁷)是去學校才請老師教的。因為對生活中學的母語，講的話較有感情、才會紲拍(sua³-phah⁴)，嘛才有法度保留家己族群的腔口佮文化。所以今仔日，除非咱甘願卜將家己的母語放搡(sak⁴/sat⁴煞)，若無咱愛佇厝裡參序細講母語，毋(m⁷)通擱予阿公、阿媽用足食力的北京語參孫仔交談。尤其細漢囡仔，佇伊一暝大一寸的成長期間，教伊台灣的「囡仔歌」，會當予伊表現天真浪漫的感情，接觸鄉土的色彩、感受生活的鹹酸甜，予伊一面嗍(suh⁴)著阿娘的奶芳，一面聽著土地的聲嗽，過著一個快樂的童年，做一個正港的台灣人。

(寫佇2001年5月16，台南縣教育局委託歸仁國小舉辦台語師資研習班的起鼓日，董峰政記)