台語歌仔冊─踏話頭一(代序)

我來唸歌囉─認識「台語歌仔冊」

   自清朝以來，台灣民間流傳著一種說唱的文字書寫，文字形式主要以七言來解說，所以叫做「七字仔歌」，而且印出來的刊本多數是長十五公分、闊九公分的細本冊，所以擱稱呼做「歌仔簿」抑是「歌仔冊」。「歌仔簿」往往是一本薄薄仔，正十頁的細本冊，囥佇橐袋仔真方便。

    台灣早期農業社會裡，有一種從事走唱的「歌仔先」，時常佇街頭巷尾「唸歌仔」講故事，過去鄉村莊跤無啥乜娛樂，所以定定去廟埕聽人「唸歌、唱曲」做為消遣。「歌仔先」自編自唱，唸歌唱曲的同時，順紲推銷家己印的「歌仔簿」。

    歌仔冊的書寫主要使用福佬話，嘛有一部分是用客家話來記錄，怹攏是用活跳跳的語言來表達，會使講是台語文學的寶藏。過去漢字攏是為北京話咧服務，所以編寫「歌仔」的人都用家己的方式來寫漢字，主要是以借音的方式來進行，比如：「月裡心匏小漢飼」，以即碼台語文界的寫法是「月裡新婦細漢飼」，其中「新婦」佮「細」不管就伊的意思、抑是讀音，攏較符合台語漢字的書寫。

    台灣的說唱是對民間歌謠(民歌)即個基礎發展起來的。歌仔的名稱真複雜，除了號做「歌仔」以外，擱有「歌」、「唸歌」、「歌詩」、「歌仔調」、「四句聯」、「七字仔歌」種種無仝的稱呼。佇說唱內底，上簡單的歌仔是四句聯起來，著會當成做一條歌，所以亦叫做「四句聯仔」；佇咧表演的時叫做「唸歌」。所謂的「唸」，著是接近語言聲調的「講」，「歌」著是指唱的部份。所以「唸歌」其實著是「半講半唱」、「說中帶唱，唱中帶說」抑是「那講那唱」的表演方式。「唸歌」所用的唱調民間叫做「歌仔調」。用來記載「歌仔」唱詞的冊，叫做「歌仔簿」、「歌仔冊」。遮個「歌仔簿」屬佇民間文學的範圍裡(lin⁰)，攏是用七言四句的文體寫的，所以號做「七字仔」。

台灣民間的說唱歌謠，若是以歌謠的長短來分類，會當分做長篇、中篇、短篇。以上若是以歷史故事、民間傳說佮社會寫實做題材的，大部份是中長篇的歌謠。若是以勸世教化、情愛、笑詼做素材个，大部份是中短篇的歌謠。若是以歌詞的內容來分，一般地會當分做下面幾種：

(一)台灣民間故事佮傳說：比如周成過台灣、鄭國姓開台灣、白賊七也、乞食開藝旦、基隆七號房慘案、台南運河奇案、二林鎮大奇案、八七水災歌、甘國寶過台灣、義賊廖添丁、六十條手巾、林投姐等等。

(二)中國民間故事佮傳說：比如，開天闢地、三國演義、薛仁貴征東、陳三五娘、二十四孝、大舜坐天、梁山伯祝英台、金姑看羊、白蛇傳等。

(三)勸世類的故事：比如人生必讀書歌、世間開化歌、收成正果歌、勸化唸佛歌、社會教化歌、從善改惡歌、勸孝歌、自新改毒歌、勸改跋繳(puah⁸-kiau²)歌等。

(四)情歌類：茶園相褒、問路相褒、農場相褒、烏貓佮烏狗相褒歌、妓女哀歌、十二更鼓等。

(五)笑詼類：胡蠅(hoo⁵-sin⁵)蠓仔大戰歌、草地查某、貓鼠相告歌。

(六)其他類:：婚嫁歌、產物歌、地名歌、鬧洞房歌、食新娘茶講四句歌。

        歌仔冊的內容，是直接用台語思考所編寫出來个，所以伊的語言是相當的生活化佮口語化，會使講是一種「正宗原汁」的台灣話，佮即碼受著北京語的影響，所形成「半精白」的台灣話，是大不相同个，今仔日咱若想卜用純正的母語來表達，遮個歌仔冊的內容，著是上好的見本。

((2001.08.10寫佇崑山鯽仔魚潭的徛家)