台語歌仔冊─踏話頭二(代序)

「認識台灣」着是對(ui³)土地、歷史、語言、文學、族群、音樂、美術、建築、古蹟等方面來了解，這是建立台灣意識、台灣主體性、台灣本土化的營養份佮肥底。若毋是對家己的田園出發个，台灣永遠着是「文化的殖民地」，本土文化永遠無法度佇即塊島嶼掖種、釘根佮生澶(thuann³)。

過去台灣的教育有足大的偏差，佇大中國主義的情結之下，咱台灣的讀冊囡仔，對中國二千外冬的歷史人物，親像紅燒豬跤─熟溜溜，但是對台灣四百冬來的歷史祖先，着親像生分人(senn¹-hun ⁷-lang ⁵)，毋(m ⁷)知影家己的根源，致使台灣人干礁(kan¹-ta¹)知影家己是「炎黃子孫」，煞無了解家己真正的身分是「唐山公佮平埔媽」結合的後代。蹛佇(tua³-ti⁷⁾台灣熟似遙遠的「長江、黃河水」，卻不知(ti¹)「台江、運河水」。咱的青少年輩，會曉講足標準的北京語，但是無法度用「阿娘的話」(台灣話、客家話、原住民話)來參厝內的序大─阿公、阿媽開講，家庭的親情倫理受著嚴重的破壞。歌謠只唱「龍的傳人」、「梅花」，卻不知「寶島頌」、「菅芒花」。文學只讀古早的「詩經」，根本毋知台灣文學有優美的「台灣國風─褒歌」…。總講一句，生活佇台灣即塊島嶼的子弟，頭殼內貯(te²)个攏是「十三天地外」的物件，台灣人親像活佇雲頂一般，隨風漂散，莫怪足濟人對即區(cit⁴-khu¹)家園無認同，對即塊(cit⁴-te³)土地無疼心，台灣無法度成做一個「命運的共同體」，根本的原因著是人民對台灣本土文化的認識無夠所致。

    其實佇西元1566年(明．嘉靖45年)，咱的祖先着已經有用台語文創作「荔鏡記」的劇本，即個劇本屬於南管的戲文，內容描寫陳三、五娘的愛情故事。另外有歌仔冊(簿)、歌仔戲戲文、布袋戲戲文、七字仔─褒歌、皮影戲戲文…。咱對(ui³)1566年的「荔鏡記」算起到即碼，台語的民間文學創作總也共也嘛已經超過四百外冬(這是指使用台語文來講)。遮个(這些)台語民間文學，是台灣戲劇、小說的源頭，是台灣歌詩、現代詩的活水，會使講是台灣現代文學的肥底，嘛會當證明台灣是有文學个、台灣文化是有水準个，尤其是台語文的古老性、典雅性、豐富性。佇本土化受重視的今仔日，蹛佇即塊土地的「台灣人」(指認同即塊土地的人)，袂(be⁷)使對遮个寶貴文化遺產，目珠放瞌瞌(kheh⁴)，喙激恬恬(kik⁴-tiam⁷-tiam⁷)，頭殼空空，若安爾著枉費做一個有「文化」有「尊嚴」的台灣人。

    即碼將台灣佇民間流行的歌仔冊，有台灣故事性做一番的整理，除了一一標記羅馬拼音以外，擱較重要的工課是將原本無一致的台語漢字，做了一番的改寫，予台語書寫的漢字會當儘量一致，並且使用漢字的「本字」佮台語界常用、公認的用字，換一句話來講，台語文所使用的漢字有一定的根據，相信佇一遍擱一遍的整理當中，台語的漢字用字著會較精密佮社會的基礎性。

    即本冊佇整理過程中，我的查某囝俐荁、同事庸英等攏出袂少力、佇遮特別提出來表示感謝。最後向望逐家重新來認識台語文學的媠(sui2)，並且共同來發揚台灣本土文化，予較濟人來認同台灣。若安爾，咱卜建立以台灣為主體性的文化，著毋是咧做眠夢囉。

(2001.08.01寫佇第四期府城台語開講期間)