科目名稱：由「紲拍兼鬥句」談台語之美

嘉義縣大林鎮平林國小

週三進修專題講座

11/13/2002  13:30─16:30

講師：董峰政/鯤島台語文研究會/國立高雄餐旅學院/

e-mail：tang1109@yam.com   網站：demo1.nkhc.edu.tw/~t0015/

大綱：

•起鼓─踏話頭   

•趣味性：食茶講好話

•音樂性： 七聲八調；變調

•古典性：讀書音、入聲字、古漢字

•文學性：七字仔、褒歌

•思想性：台灣俗語

• 尾聲─收話尾     

由「紲拍兼鬥句」談台語之美      主講人：董峰政

起鼓─踏話頭

    台語佇(dī)過去因為長期實施「國語政策」的關係，所以受著足(ziok)大的壓制，致使絕大多數的人對台語無了解，往往認為台語是無水準的、是下(gē)路的、是粗俗的語言，即款的認知是對台語足大的誤解，即款的講法對台語嘛是一種的侮辱。但是當咱了解台語的嫷(sùi)、台語特色了後，一般人顛倒會感覺台語是心適的、古典的、高雅的、有深度的、有內涵的，會當(dang)透過對母語的了解，建立對家己族群、社會、台灣的自信佮尊嚴。

    佇全世界差不多有三千外種的語言當中，咱的(ĕ)台語(前身河洛話、福佬話、閩南話)會使(sài)講是屬於上優美的語言之一，即款的講法，除了因為台語是咱个母語，是阿娘的話，所產生「主觀的感情」以外，蓋主要是有足濟「客觀的事實」，會當來證明。佇遮(zia)咱著對(ui)台語的趣味性、音樂性、古老性、文學性、思想性來搵(un)一下仔豆油，做簡單的說明。

一、趣味性

    台語本身是一種心適、趣味的語言，咱會當隨時用身驅邊的物件，對四周圍的親友、同事，講一寡感謝的話、祝福的話、心適的話，甚至創治的話。比如：咱用茶(酒)杯來做例；

．講好話，祝福的話：

「茶米啉落喉，祝汝事業早出頭。」        (啉lim)

「茶米啉一喙，予汝榮華兼富貴。」        (喙cui，嘴。)

「酒杯圓圓圓，予汝富貴萬萬年。」

「酒杯深深深，在座各位會仝心。」        (仝gāng，同)       

「酒杯捧過來，祝福年年大發財。」

「酒杯捧過去，祝福人人有福氣。」

「酒杯捧峘峘，祝福子弟中狀元。」        (峘gŭan，高。)

「酒杯捧下下，逐家趁錢無地下。」        (下gē，低。下hē，放。 )

「酒杯捧正正，各位會得眾人疼。」

「酒杯囥一爿，共人借錢無免還。」        (囥kng，放。爿bĭng，邊。)

「手牽手天長地久，喙對喙萬年富貴。」

    汝看是毋(˜)是真趣味，句句講出來的話，那像咧(leh)吐象牙一般，聽的人歡喜，講的人嘛心適。台灣俗語講：「毋是新婦爻(ghău)，是佐料(配料)夠。」換一句話，只要咱認識台語、學好台語，任何人攏會當講出真心適、真趣味、真古典的台灣話。

二、音樂性： 七聲八調；變調

．七聲八調 

  台語上大的特色是「八音七調」加上「變調」，所以用台語講話親像咧唱歌。因為，台語本身有伊的「音樂性」。比如講：

「佇溪邊」、「五千箍」、「亂嘈嘈」、「唸詩經」、「有真心」、「飼精牲」就是「Do-Re-Mi」的調；

「買車票」、「好佳哉」、「煮魚翅」、「討分數」、「買新褲」就是「Mi-Re- Do」的調。「八音七調」相當是音樂上的「Do-Re-Mi-Fa-So-La-Si-Do」，比如講：

衫1、短2、褲3、闊4；人5、矮6、鼻7、直8

獅1、虎2、豹3、鱉4；猴5、狗6、象7、鹿8

東1、黨2、棟3、督4；同5、黨6、洞7、毒8

君1、滾2、棍3、骨4；裙5、滾6、郡7、滑8，

其中的數字是代表聲調，即款的特色，是全世界其他語言所罕見的。所以從事台語歌謠的人，必須愛知影台灣話八音七調的運用，比如：「雨夜花」歌詞中「花謝落塗不再回」，因為無掌握好聲調，所以「花謝」唱起來變成「會社」；「媽媽請汝也保重」歌詞中「自我來到他鄉迄個城都，不過我是真『用行』」，「勇健」唱起來變成「用行」，意思完全走精--去。如果若完全掌握了台語的聲調，用唸的著那像用唱的仝款，比如囡仔歌：

白鴒鷥 

白鴒鷥，車糞箕，車到溪仔墘，跋一倒，抾著二先錢。

一先買餅送大姨，一先儉起來好過年。

坐飛機 

坐飛機看天頂，坐大船看海湧，坐火車看風景，

坐公車錢卡省，坐牛車順紲挽龍眼。

甜粿過年

甜粿過年，發粿發錢，

包仔包金，菜頭粿食點心。

    另外台語嘛有「本調/字調」佮(gah)「變調/詞調」之分，比如「愛」「河」、「愛河」分開讀參作伙讀，音調是無仝的。比如：

「敗腎(拜神)的人是好人」，

「我罵(嘛)是台灣人」、

「咱弄(攏)是台灣人」、

「做朋友愛先睏(誠懇)鬥陣」、

「學台語腫腫(整整)兩個奶頭(年頭)」

「食卵的時陣，汝卜閹(鹽)無？」

講出來的台灣話真是予(hō)人笑破腹肚皮，這攏是聲調不對的關係，所以有人講伊台語嘛會通，其實有的是「袂曉假澎(pong)風」。

三、古老性─讀書音、入聲字、古漢字

     台語保留了一千三百外冬前唐朝時代的官話，也着(diorh)是「讀書音」佮「入聲字」，以及「古漢字」，這佇語言學來講，是人類一種足寶貴的文化遺產。下面分別做說明 ：

．讀書音

「登高必自卑，行遠必自邇。」    (卑-邇bi- nì)」

「近朱者赤，近墨者黑。」                (赤-黑cik-hik)

「酒逢知己飲，詩向會人吟。」    (飲-吟ìm-gĭm)

「兩人一般心，有錢堪買金。」   (心-金sim-gim)

楓橋夜泊    張繼

月落烏啼霜滿天，江楓漁火對愁眠，

姑蘇城外寒山寺，夜半鐘聲到客船。

    其中「月落」「啼」、「霜滿天」、「楓」、「漁火」「眠」、「城外」、「寒山」、「半」、「鐘聲」、「客船」，分別有「白話音」參「讀書音」的兩種讀法。用另外一句話來講，台語是雙聲道的。三十冬前黃俊雄佇電視台所搬演的布袋戲，伊所唸的詩詞攏是用「讀書音」唸出來的，即款正宗原汁的台灣話，當初時感動足濟台灣人。另外過去「私學仔」所教的「昔時賢文」、「三字經」、「千家詩」等，嘛是攏用讀書音來朗誦的。

．入聲字

    擱來，台語保留了「入聲字」，這是台灣話寶貴的文化資產，華語(北京語)早着無入聲字，這是因為北方長期受著胡人(尤其五胡亂華以後) 統治，產生胡語化的結果。古早人講：「禮失，求諸野。」，「入聲字」上大的特色是「音短促而急收藏」，音節短而且馬上結束。因為有入聲字的關係，所以用台語朗誦唐詩，有抑、揚、頓、挫的變化，聽著加足紲(煞)拍，那像天籟一般。比如：

怒髮衝冠，憑欄處，瀟瀟雨歇。                               

抬望眼，仰天長嘯，壯懷激烈。                               

三十功名塵與土，八千里路雲和月。               

莫等閒，白了少年頭，空悲切。                               

靖康恥，猶未雪；               

臣子恨，何時滅？               

駕長車，踏破賀蘭山缺。

壯志飢餐胡虜肉？               

笑談渴飲匈奴血。               

待從頭，收拾舊山河，朝天闕。               

其中「歇hiat」、「烈liat」、「月ghuat」、「切ciat」、「雪suat」、「滅bhiat」，「缺kuat」、「肉riok」、「血hiat」、「闕kuat」」等攏是屬於跤(腳)擋手擋的入聲字。

．古漢字  

    足濟(許多)人有共同的疑問，台灣話敢有字？台語敢有文學？汝看即(這)篇文章，着是用正港的台灣話寫出來，這是台灣話有字上好的證明。換一句話講，台語是會當寫文章的，俗語講「喙(cui嘴)講父母話，手寫台語文」，用母語來寫文章，汝會感覺感情十足，寫作嘛變一件卡(較)輕鬆的代誌。尤其是台語保留了足濟古早的漢字，比如：「舉箸─拿筷子」、「伊─他」、「走─跑」、「鼎─鍋子」、「食糜─吃稀飯」、「有身─懷孕」、「斟酌─注意」、「枵腹肚─餓肚子」、「凊飯─剩飯(冷飯)」、「晏起─晚起」、「讀冊─讀書」、「作穡─農事」。

四、文學性

    有關台語的文學性，我着用流行佇台灣民間數百年的「褒歌」來簡單證明台語是有文學的。褒歌又被稱呼做「台灣國風」，伊的特色是「七字仔」、「四句聯」、「全鬥句」，哪親像詩經的「十五國風」一般。比如：

半暝月娘

半暝月娘入紗窗，偏偏照我守空房，關窗將月緊緊送，送去隔壁照別人。

鼓井有水

鼓井有水清又深，落落紅柑半浮沈，若是卜沈沈落去，勿擱浮起動人心。

阿君卜轉

阿君卜轉阮卜留，留君神魂用紙包。等君去後提來敨，日日見君佇阮兜。

一尾好魚

一尾好魚毋食釣，走到江中尾直搖，掠汝袂著予汝笑，堅心做網拋甲著。

千里路途

千里路途無嫌遠，見面親像蜜攪糖，苦毋時鐘行倒轉，好話未講天先光。

阮厝踮佇

阮厝踮佇娘厝後，不時看娘咧探頭；情意總有九分九，路邊相撞頭勾勾。

以上所舉例的台灣國風─褒歌，台灣歌謠內容表現了心適、鬥句、紲拍、笑詼(kue)、樸素的特色，相信任何人看了攏會有真趣味、足親切的感覺。

五、思想性

最後咱來講台灣的俗語， 一個族群的語言，上會當表現語言的特色，是伊的「俗語」。俗語是一個族群生活經驗的智慧，亦是一個族群的風土民情佮思想信仰的縮影，反映迄(hit)個族群的個性，透過祖先的「古早話」予咱會當了解本土文化的源頭。台灣的俗語，除了充滿人生智慧佮(和)哲理外，另外配合語言本身的音樂性，使得台灣俗語到處看會著、聽會著「押韻」的旋律，若像一首短短優美的歌詩。比如：「一更窮(gĭng)、二更富(bu)、三更起大厝、四更拆袂赴」、「一牽成、二好運、三才情」、「初三四，月眉意；十五六，月當圓；二三四，月暗暝。」迹(ziah)爾優美的俗語，那像「天籟」一般，身為台灣人的囝孫，咱有應務來發揚光大。下面介紹「押韻鬥句」的俗語予逐家做參考：

．九頓米糕無上算，一頓冷糜抾去囥。(sng-kng)

．人情世事陪甲夠，無鼎佮無灶。(gau-zau)

．卜去烏影，毋去吊鼎。(iàⁿ-diàⁿ )

．大工一下指，小工磨半死。(gì-sì)

．大路毋行，行彎嶺；好人毋做，做歹囝。(liàⁿ-giàⁿ)

．燒糜傷重菜，嫷某損翁婿。(cai-sai)

．不孝新婦三頓燒，有孝查囝路上搖。(sior-iŏr)

．嫷花佇別人欉，嫷某佇別人房。(zăng-băng)

．做雞著筅，做人著反。(cìng-bìng)

尾聲─收話尾

       有人講語言干礁(gan-da)是一種溝通的工具而已，會通着好。即款的觀點，對家己的母語來講是相當偏差的。因為語言不止是「溝通的工具」，伊嘛是一種「思考的方式」、「感情的交流」、「族群的標記」、「文化的延續」、「尊嚴的維護」，會使講一個語言就是一個「族群的符號」，所以卜滅一個族群先滅伊的語言開始，咱看今仔日的平埔族群，親像完全佇台灣消失去一般，其實是因為平埔族語言無人傳承的關係，致使到當今煞變成「失聲」的族群。佇台灣，母語是台語(參客家語、原住民語)的人愛有相當的覺醒，若無以後嘛仝款會行入平埔族的命運，淪落「失聲」的族群。最後向望逐家作伙來重視咱的母語，予「台灣話」變成即塊土地共同的「聲嗽(sau)」。

講師簡介

董 峰 政

台語文網站：demo1.nkhc.edu.tw/~t0015/

(榮獲天下雜誌評2000年為全國語文類十大網站)

經歷：

•國立高雄餐旅學院通識教育中心專任講師(1996∼)

•南都廣播電台「母語的田園」主持人

•國立成功大學語言中心台語班兼任講師(1999∼)

•國立台南師範學院台語文化研習社指導老師(1999∼2002)

•台南市菅芒花台語文學會總幹事(2000∼2002)

•台南市鄉城台語文讀書會創會會長(1996-1997)

•美國北加洲台客語師資研習班講師(2002.07)

•國立台南師範學院─國民中小學台語種子教師培訓班講師(2001)

•國立新竹師範學院─國民中小學台語種子教師培訓班講師(2001)

•國立新竹師範學院─台語所十學分班講師(2000)

•國立台南社教館台語初、中級師資研習班講師(1999-2000)

•台南市教育局復興國中雙語師資班講師(1999-2000)

•台南縣教育局成功國小雙語師資班講師(2000)

•高雄市教育局小港國中台語師資研習班講師(1999-2001)

•高雄市教育局鹽埕國中台語師資研習班講師(1999-2000)

•高雄市教育局光武國小台語師資研習班講師(2000-2001)

•「菅芒花詩刊革新號」社長(2000∼)

•「台灣鄉土雜誌」編輯顧問(1998∼)

•台南市文化基金會執行委員(2000-2001/2002∼)

•高雄市、台南市扶輪社「台語之美」主講人(1999-2001)

•文建會、漢聲電台「台語智慧系列講座十八場」主講人(1999-2000)

•國立高雄餐旅學院(原餐旅專校)圖書館創館主任(1996-1999)

•崑山科技大學(原崑山工專)學輔中心主任(1985-1986)

•台南女子技術學院(原台南家專)圖書館主任(1989-1994)

台語文著作：

•       B01母語的田園─台語文天地     

•       B02文學的肥底─台灣褒歌

•       B03漢學仔冊精選─昔時賢文等 

•       B04喙舌佮筆尖─台語文寫作集

•       B05台語的古典─千家詩(羅馬字版) 

•       B06母語的奶芳─台語囡仔歌

•       B07祖先的智慧─全鬥句的台灣俗語  

•       B08千古絕唱─唐詩三百首

•       B09文、白音對照字典(羅馬字版)    

•       B10千古絕唱─唐詩三百首  

•       B11空中的聲音─母語的田園

•       B12正港的台語─華台文對照典

•       B12 開花兼結子─母語的稻穗