h.gif (2826 bytes)
h1.gif (1979 bytes)

【本土情.在地味.好鬥句】


台灣俗語─古早話 (台語文)
撰文:董峰政

一個族群的語言,上會當表現語言的特色,是伊的「俗語」。俗語是一個族群生活經驗的智慧,亦是一個族群的風土民情佮(kah4)思想信仰的縮影,反映迄(hit4)個族群的個性,透過祖先的「古早話」,互咱會當了解本土文化的源頭。

台灣的俗語,除了充滿人生智慧佮哲理外,另外配合語言本身的音樂性,使得台灣俗語到處看會著、聽會著「押韻」的旋律,若像一首短短優美的歌詩。譬如:「一更窮(keng5)、二更富(pu3)、三更起大厝、四更拆袂赴」、「一牽成、二好運、三才情」、「初三四,月眉意;十五六,月當圓;二三四,月暗暝。」遮爾優美的俗語,若像「天籟」一般,身為台灣人的囝孫,咱有應務愛來甲發揚光大。目前書局有關台灣俗語的書,會使(sai3)講五花十色,唔拘大多數無具備「系統性」,無重視語言押韻的「音樂性」,無稽考用字的「正確性」、無使用羅馬拼音的「一致性」,使得台灣俗語的「原汁口味」無法度充分的表達。

為卜(beh4)將台灣俗語的水(sui2)發揚光大,筆者特別挑選三百六十外條的人生俗語,遮兮(chia1-e5)俗語的特色,除了展現「本土情、在地味、有智慧」以外。特別強調下面幾點的特色:

一、採用有押韻的俗語:
押韻另外一句通俗的講法叫「鬥句」。有鬥句的俗語,讀起來順口好唸、好聽、好記,若像對聯,嘛若像一首詩。

二、按照筆劃順序:
「人生俗語」的內容,是按少筆劃到濟(che7)筆劃的順序,做有系統的紹介,按爾(ni2)會當方便讀者的閱讀佮收集。

三、採用羅馬拼音:
若遇到外來語亦是恰(khah4)少使用的字,就採用羅馬拼音來標記發音。羅馬拼音佇台灣長老教會的使用,已經有一百外冬的歷史,對所有台語的發音,攏會當標記,相當的方便。比如:「鬥句」標為〔tau3-ku3〕其中數字3表示第三聲調。李遠哲院長嘛捌(bat8)公開鼓勵就學的學生練習使用羅馬字,以迎接國際化的來臨。

四、內容用台語漢字做說明:
過去台灣俗語所使用的文字,並無稽(khe2)考,烏白揣字來鬥,譬如:「少年不會想,吃老便不像樣」,這是半台語、半北京語的寫法,正確的台語文寫法是「少年袂(be7)曉想,食老著唔(m7)成樣」。而且內容攏是使用北京語做說明,互人讀著總感覺隔一層膜,無法度真正感受著「台灣味」─鹹酸甜的滋味。足濟人以為台語是有音無字,無法度寫出文章,其實這是一大誤解,主要的原因是,滯佇(toa3-ti7)即塊土地的人,過去一直無機會學習、無接觸所致。汝看即篇用台語文所寫出來的文章就是上好的證明。

五、用字參考教育部公佈的「閩南語字彙」:
佇人生俗語的專欄內底,阮所使用的台語用字,主要參考教育部所公佈的「閩南語字彙」佮「普通話閩南語詞典」等辭典,另外嘛特別請教─成大中文系台語文權威施炳華教授佮台語文名作家黃勁連老師指導用字。

目前正是本土文化提倡的時機,國人想卜(be7)了解、學習台語文的人愈來愈濟(che7),相信「喙(chhui3)講台灣話、手寫台灣文」,即個階段已經來臨了,台灣文藝復興的時代,也漸漸逼近,但願透過「人生俗語」開講的發表,會當為本土文化盡一點心力,同時嘛向(ng3)望關心本土文化的人,多多甲阮指教。

 〔註〕

  1. 「佮」愛:佮kah4,音讀「甲」。與、和之意。
  2. 「迄」個族群:迄hit4,「即」chit4的相對詞。指那個族群。
  3. 一更「窮」窮keng5,音若「競」第5調。
  4. 「囝」孫:囝kiaN2,音若「京」第3調。子孫的意思。
  5. 「使」講:使sai2,音讀「屎」。意指可以說是。
  6. 「唔」拘:唔m7,音若「姆」第7調。不過的意思。
  7. 「卜」:卜beh4,音若「麥」第4調。為著要…。
  8. 台語的「水」:水sui2,音讀「風『水』」。指台語之美的意思。
  9. 「遮兮」俗語:遮兮chia1-e5,指這些俗語的意思。
  10. 「濟」筆劃:濟che7,音讀「坐」。指多筆劃的意思。
  11. 「爾」:爾ni1,音讀「奶」。指照這樣子的話。
  12. 「恰」少:恰khah4,音讀「卡」。指較少的意思。
  13. 「捌」公開:捌bat4,音若「密」第4調。指曾經公開之意。
  14. 「稽」考:稽khe2,音讀「啟」。指稽查考證之意。
  15. 「袂」曉想:袂be7,音讀「賣」。指不會想。
  16. 「滯佇」台灣:toa3-ti7,音讀「帶」「置」。指住在台灣的意思。
  17. 「彙」:彙lui7,音讀「類」。指字詞之意。
  18. 「喙」講:喙chhui3,音讀「翠」。嘴巴說。
  19. 「向」望:向ng3,音若「阮」第3調。希望之意。