一人一家代，tai⁷
公媽隨人栽。chhai⁷

即(chit4)句俗語，強調兄弟成家了後，愛隨人獨立門戶，袂使佫(be7-sai2-koh4)有想卜(beh4)倚靠兄弟的心理。獨立門戶了後，嘛愛隨人盡著對祖先的義務佮責任。

樹仔大欉愛分枝，兄弟大漢著愛分家。一旦分(pun1)家了後，著愛當家做主，家己安排祖先靈位神主牌的順序，唔通(m7-thang1)互外人來干涉。依人來講，每一個人攏是獨立的身軀，有伊家己的意志、思想，袂使隨便互人控制的。共款，每一個家庭，嘛是分門別戶，袂當(be7-tang3)容允外人隨便侵入，干涉家庭的生活方式，有一句英國人的俗語講：「每一間厝，攏親像是一座城堡」，來強調家庭的莊嚴佮神秘。所以佇現代社會裡，咱除了愛學習獨立自主以外，嘛愛對別人的決定有一定尊重。古早人講：「五百冬前共一鼎，恁(lin2)房通阮廳」，雖然算算攏是一家人，唔拘嘛是愛隨人家己去拍拚，以後互相才(chiah4)鬥跤手。就即個觀點，嘛是會當用佇「台灣」佮「中國」的關係，值得逐家去思考。

參即句俗語有相關的：

1. 隨人討掠，隨人落鼎。
2. 一代親，二代表、三代散了了。
3. 一人一家代，無人愛人知。
4. 拍虎掠賊，也著親兄弟。
5. 隔壁親家，禮數原在。

　〔註〕

1. 一家代：「代」tai7，音讀「貸」。指自家的事情。
2. 公媽： 「媽」ma2，音讀「千里『馬』」。原指祖父、祖母。此指男姓祖先曰「公」，女姓祖先曰「媽」。
3. 隨人栽：「栽」chhai7，音如國語「『裁』示」。指隨各人方式來安放、祭拜祖先靈位之意。