一兼二顧，koo³
摸蜊仔兼洗褲。khoo³

即句俗語，咱時常佇生活中聽人咧(le0)講，意思是「一舉兩得」，一句歡喜得意的話，有趁著的感覺。用今仔日的話來講，著是做一項代志，除了原本的結果，另外佫(koh4)再產生附加價值，即款的做法，是目前工商社會，上注重的一種生產管理策略。

有人講，一句俗語是一個生活文化的縮影，即句「一兼二顧，摸蜊仔兼洗褲」著是足好的說明。過去台灣農業社會，普遍地生活簡單困苦，所以庄跤(kha1)人，通常利用大自然的溪仔水來洗衫褲，嘛定定利用大自然成長的生物，比如郊外野生的「野菜」，山頂土生的「果子」、水內的「魚蝦」。所以一面洗衫處理家務，同時亦順紲(soa3)抾一寡蜊仔來解決三頓的問題，佇困苦中有樂觀的一面。即句俗語，有人唸做 「一兼二顧，三摸蜊仔四兼洗褲。」唸起來，若像一首短詩。

參即句俗語相關的：

1. 一面抹壁，雙面光
2. 一空掠(liah4)雙隻─叫好空
3. 一餌(ji7)釣雙魚
4. 有食佫有掠
5. 鰗鰡巡便空

　〔註〕

1. 一兼二顧：付出一份勞力，卻可以同時獲致兩種成果。
2. 蜊仔：la5-a2，讀台語音「臘」，狀似田螺的水中生物。
3. 一餌釣雙魚：「餌」ji7，讀台語音「字」。釣魚時誘魚上鉤的食物。