一人主張，tiuN¹
唔值兩人思量。liuN⁵

即句俗語，強調團隊的精神，一個人的能力總是有限，往往無法度觀前顧後，若加一個人來鬥參詳，著會當看頭看尾，恰(khah4)無容易出差錯。

每一個人出身的背景，唔(m7)管是家庭環境，人格特質、求學過程、專業訓練、思想形成，因為受著某方面的限制，造成個人一寡(koa2) 仔主觀的看法佮偏見。所以當咱做一個重大決定的時陣，有需要加聽一寡人的意見，唯(ui3)各種無共的角度來討論，突破個人的盲點佮限制，才會當得著一個恰完整的結論。安爾，不但別人有參與的機會，家己嘛有成長的空間。「固執」的人，總是恰無法度變竅，往往誤了大事，家己猶原(iu5-goan5)唔知影，這著是無真正體會「一人主張，唔值兩人思量」的涵意，即句語也就是國語所講的「集思廣益」的意思。

參即句俗語有相關的：

1. 一人智，唔值兩人議。
2. 相佮米，食有申(chhun1)。
3. 三人共一心，烏土變成金。

　〔註〕

1. 唔值：「唔」m7，表否定之意。指比不上的意思。
2. 兩人：「兩」nng7，音如「卵」。指兩個人，多數之義。