一暝全頭路，loo⁷
　　天光無半步。poo⁷

即句俗語照字面的意思是：一暝想甲規大堆的計劃，隔工唔是攏無做，著是行袂通，一點仔辦法都無。用另外一句話講：「干礁知影坐咧講，唔知影愛徛起來做。」

「眼高手低」即款的現象，不只發生佇個人。其實整個的政府機關，嘛攏是安爾。一下仔囝講卜「心靈改革」，社會風氣煞愈敗壞，搶劫、綁票、強姦、殺人、放火逐工發生。即馬佫喝(hoah4)講「亞太營運中心」、「亞太金融中心」、「科技島」…，了解實情的人，攏知影這是咧喝爽的，因為參基本的通訊品質都顧袂好勢，上網路揣(chhoe7)資料等規半晡，相關的制度一直無法度建立。嘛喝講卜「本土化」，結局參認識台灣的課本都編袂好勢，新新人類百分之九十以上，講袂好家己的母語，這卜安怎叫即代的少年仔，疼痛即塊土地。總講一句，若無心，一切的「頭路」攏佇半空中咧浮。

參即句俗語有相關的：

1. 做人著反，做雞著筅。
2. 一隻虱母，謗(pong3)甲水牛大。
3. 在職怨職，無職思職。
4. 一暝看甲天光，唔知皮猴一目。
5. 暗，暗原在，天光無赫(hia2)快。

　〔註〕

1. 頭路：即工作，在此指計畫、 方法的意思。