七月頓頓飽，pa²
八月攏無巧。kha²

即句俗語字面的意思：佇(ti7)農業社會一般家庭經濟無好，所以生活普遍困苦。但是拄(tu2)著過年過節的時，攏會備辦恰腥臊(chheN1-chhau1)的物件來拜拜慶祝。舊曆七月民間號做是「鬼仔月」，民俗認為七月初開鬼門關，中旬家家戶戶舉行普渡。月底關鬼門關，嘛需要祭拜好兄弟(指孤魂野鬼)，拜拜的時陣備辦三牲酒禮，大魚大肉。七月時仔，因為拜拜的次數濟(che7)，所以定定有食腥臊的機會，相對夠八月無啥乜(mih4)節日，所以八月時仔，著恰無奇巧的物件通好食。

語言不只干礁溝通的工具，伊隨時咧反映、保存生活的風俗，這是每一個語言的獨創性格。換一句話來講，語言的內底往往蘊藏著伊的文化特色。譬如講，「七月頓頓飽，八月攏無巧。」、「七月半鴨仔，唔知死活」，這是佇有普渡儀式的地區，才會產生的一句話。「牽豬哥，趁暢。」、「鴨仔聽雷。」這嘛是佇農業社會，靠豬公(kang1)拍種的行業；另外有趕鴨陣四界討食的行業，佮落「西北雨」地區才有的一句俗語。所以語言若袂曉講，伊所蘊藏的文化亦綴(toe3)咧消失去囉，所以每一個族群(福佬、客家、原住民等)攏愛重新認識家己的母語，唔通將家己變成「失聲的一代」。

參即句俗語有相關的：

1. 有，做虎陷(ham7)；無，做虎撐頷(am7)。
2. 有錢食鮸(bian2)，無錢免食。
3. 好天，著存雨來糧。
4. 囡仔食夠畏(ui3)，則有通落公婆喙(chhui3)。

　〔註〕

1. 攏無巧：攏long2，讀台語音「明『朗』」全部之意。指都沒有較特別美味(山珍海味)的菜餚。