人爻， gau⁵
天咧做對頭。thau⁵

即句俗語主要是咧(leh4)表示，人的聰明才調(tiau7)佮天是袂比的。所以往往「天不從人願。」勸「人」唔通驕傲，愛會曉謙卑、知進退，這才是為人之道。

佇台南有三大名匾，「爾來了」、「了然世界」、「一」，其中以天公廟(天壇)的「一」字匾上出名。即塊「一」字匾，教示眾善男信女講，「千算萬算，唔值天一劃。」基督教的聖經箴言有一句話講：「汝著專心倚靠上帝，唔通倚靠汝家己的爻。」「天公」也好、「上帝」也好攏會當看做大自然的主宰，代表的是世間的「真理」。過去因為「人」的無知，想卜超越大自然，誇口講「人定勝天」，所以無限制的開發，徹底破壞了大自然的生態，結局「臭氧層」有破空，「水土保持」袂好勢，莫怪不時鬧水災、旱災等天災不斷，這攏是「天咧做對頭。」所致。「現代文明人」愛好好體會即句古早話的教示，為下一代留一塊淨土，夆囝孫有生存的空間。

參即句俗語相關的：

1. 人害人天唔肯，天卜害人在眼前。
2. 人無照天理，天無照甲子。
3. 天飼人肥肭肭(lut4)，人飼人申一支骨。
4. 人誤地一時，地誤人一年。
5. 歹年冬，雞母踏雞公。

　〔註〕

1. 人爻：爻gau5，係「音讀字」，指一個人的賢能、才華。
2. 天咧做對頭：咧leh4/teh4，讀國語音若「裂」，作副詞用，當「在」「正在」的意思。