通用拼音真好用

Diōⁿ diōng-bhù / 張忠武

國內目前台語三大拼音系統之中，通用拼音有濟濟的優點，除了e-sai將國內的華、台、客語三種主要語言通用以外，伊iau-gorh通到國外去。用通用拼音學外語（指旅遊用會話等簡單的應用，正統的學習當然是直接學伊本身的文字），外國人佮bhe-hiau講台灣話的國人，用來學台語攏真方便。比如：

一、到國外旅遊，加減會想bheh學幾句當地的語言，增加旅行時的趣味。zit-ē時陣「通用拼音」dorh會dàng派上場。

以〝失禮〞為例

日語： sīh mi ma sèn

韓語： mī an ham ni da

越語： sin lō i

英語： ăi ēm so ri

如果以其他的台語拼音法，因為攏標本調再唸變調，bheh做zit款的用途dorh困難了。

比如以越語的sin lō i 為例，TLPA有兩種可能的聲調標法：

sin¹ loo⁷ i¹

sin² loo¹ i¹

第一種標示法違反讀台語基本上除了上尾一字以外攏愛變調的讀法，仝款的標音法却無仝款的讀法顯然無合軀(su)，也會感覺bhe慣勢。

第二種標示法嘛是真奇怪，明明無變調的語言偏偏ga 伊變來變去，根本dorh是自cue麻煩。對多數原來bhe 慣勢zit種標聲調方法的人來講，是真paiⁿ 接受的。

二、外國人學台語，上頭疼的dorh是聲調的變化。若簡單的用「喙舌佮筆尖相結合」，dorh真簡單學會曉句讀，學濟了後自然dorh會曉講(親像咱細漢學台語仝款)。m-tāng用一堆數字的聲調標法佮複雜的變調ga 外國人驚gah走尾溜。

bheh發揚台灣文化，趕緊予台語拼音上路，相信這是多數人的共識。推廣一套好學、好用又通用的拼音系統，予所有想bheh學台語的人，攏真簡單學，歡喜學，早一日去鼻著台語文化的芳，看著台語文化的嫷。