花 胎 病 子 歌
| 正月病子在心內 那卜講出驚人知 看著物件逐項愛 沾沾叫哥買入來 卜央人買驚呆世 問娘想食省乜箇 乜項買甲歸大下 愛食汝著加治提 二月病子人愛睏 三噹粥飯無愛吞 思食白糖泡藕粉 叫兄去買一元銀 一碗藕粉泡鄭鄭 白糖趕緊參恰甜 問娘汝是省乜病 面色簡下即年青 三月病子人嘴秤 腳手酸軟烏暗眩 酸澀買甲歸內面 愛食樹梅鹽七珍 我緊行瓦共娘問 面色簡下即青黃 專食酸澀無食飯 想著心肝替娘酸 四月病子人畏寒 趕緊綿裘提來拌 專專愛唾白皮爛 思食竹尹群蚵干 看娘冥日連連睏 粥飯半嘴無愛吞 卜食蚵干群竹尹 差人恰緊買來群 五月病子者青慘 愛食仙查甲油柑 姊妹相招來相探 叫咱鴨母群烏參 看娘消產共落肉 嘴爛唾甲歸塗腳 粥飯袂食干飽乾 那愛油柑甲仙查 看娘酸澀食袂善 著請先生不通踐 我甲今日即看現 腹肚簡兮即大乾 病甲七月野塊病 不時不日思食甜 腹肚一日一日鄭 勸哥不免請先生 斟酌共娘恁看覓 即知娘仔有花胎 頂重下輕行袂在 倩人替娘即英皆 八月人野真干苦 腳酸手軟失袂摸 心肝即遭卜省步 愛食馬薯炒香菰 我緊伐落去料理 加炒香菰參馬薯 嘴仔汶汶成歡喜 不知汝落治冬時 九月即共君實說 打算敢是落後月 趕緊買菜乎阮配 今日卜食一柯粥 醬瓜群肉好不好 恰鹽不即食不落 後日就有子通抱 免得本成奉笑無 十月倒治眠床內 人真干若報君知 卜請產婆來看覓 扣那明白通返才 腹內囝仔塊發作 央人共咱叫產婆 看娘束拔真煩惱 恨咱小人腳手無 產婆來到講野袂 囝仔都野袂翻胎 腹肚痛甲話袂說 兮死都也無辨胚 產婆今來塊等候 扣姊這箇第一肴 打算時間亦袂到 不通延踐逞校時 產婆共咱援腹肚 囝仔雖時生落塗 加再神青罩保護 不知查某亦查埔 一時听著囝仔聲 三步拼做二步行 入來看著即知影 想見替娘著一驚 產婆手勢正實好 囝仔出世威隨落 今生過手無煩惱 問君有水亦是無 今我來去拴燒水 手巾煞提做一堆 著洗恰袂奧遭鬼 生子了後即落威 記得都無一牒久 返才煞塊洗身軀 緊共君仔伊吩咐 衫著加包恰工夫 娘子汝生頭上子 身軀洗好煞號名 實在真水得人痛 囝仔姓高名金城 囝仔抱來治眠床 昨冥干苦到天光 就緊拴乎產婆返 伊伊塊咱歸冥方 紅包我包六百銀 恰袂乎人笑雞孫 小可錢銀永無論 著恰什來共阮巡 人著做好有補所 頭胎即兮生查埔 雖然緊快袂干苦 腹肚飫甲面卜烏 紅包六百是真多 產婆相辭就返回 阿針布仔倩人洗 開廚桔餅就去提 一塊桔併做四週 塊腹著煞煮麻油 煞參一杯紅露酒 後日骨頭即袂抽 麻油進前搭來勸 灶腳燒酒歸大缸 煞炒一碗麻油飯 著食面色即袂黃 只款不者好尪婿 不免我講逐項知 拴卜乎我做月內 野袂三日雞免台 炒飯肉酒捧到位 二項排排做一堆 叫娘恰苦食幾嘴 月內無食人袂肥 茶古底威捧入內 崁鍋過塊扞去抬 汝拴桔餅甲炒飯 甘草亦袂買入門 甘草央人買元一 煞捧碗頭搭冬蜜 今日十月 廿七 廿九通好做三日 開錢無人咱這款 阿君姓高名新元 是咱從前有發愿 著恰進前諒早拴 冬蜜甘草捧到位 湯匙甌仔捧做堆 一下皆看即年水 心肝想著十分開 趕緊叫君收去勸 飼甘著水在眠床 三日那卜銃油飯 浸米著愛五斗缸 人廣諒加不通小 糯米緊糴十四石 買柯蝦米真青尺 廿九下罩金通燒 三日閂好是廿九 糯米汝糴十四包 大概按算敢有到 諒加通倖厝邊兜 著買豬油甲味素 卜買十斤兮香菰 著尋洛闊兮場所 作三十塊新攻胡 廿九親戚來者多 朋友姊妹早交倍 我塊驚恁無工藝 拜託共阮罩刈雞 各位人客全到位 排排坐坐做一堆 看著我子面形水 心肝想著十分開 諒早牲醴準備好 廳頭香燭點焰焰 厝邊真乎我呵老 兮曉共阮罩伐落 人人欣善咱好命 富貴不達咱兮名 人兮只款敢有影 子兒面形親像兄 燒金放炮在吟前 油飯捧出見人倖 門口兮人圍鄭鄭 囝仔大小塊三爭 听見外面下下叫 油飯咱銃十幾石 香菰蝦米參袂小 能逢呵老咱即著 囝仔飫甲哀哀哭 有人食甲鼻那流 一手一丸食無到 走返因厝扭碗頭 外口兩甲下下趙 敢是囝仔底無著 我治房宮想愛笑 按盞手骨簡袂燒 有箇歸碗捧塊走 有人脫衫起來包 起嘴擺腳朗來到 雄雄走甲相爭頭 我閣出來皆看覓 青冥允龜亦有來 郎食有著上加再 打算五路通巢知 (十月花胎歌 終) |