十 月 花 胎 歌
| 大家來听只條代 我今卜來念花胎 養育二字干苦代 大家恁嗎朗總知 我今卜來念出聲 勸恁列位朋友兄 我念花胎是有影 恁今著來詳細听 正月花胎龍眼大 父母有身大受磨 袂食卜吐真坐掛 真真干苦無看活 二月花胎肚員員 一粒宛然那荔芝 田螺吐子為子死 生子性命治水墘 三月花胎人真善 父母懷胎干苦連 腳酸手軟歸身變 倒落眠床咳咳千 四月花胎分腳手 肚尾親像生肉瘤 為著生子難得求 三分腹肚不時憂 五月花台分鼻嘴 好物任食都袂肥 腳盤宛然那匱水 腰骨親像塊卜開 六月花胎分男女 恐驚胎神兮參滋 三分那是有世事 靜符緊食緊身軀 七月花胎兮煞位 一日一日大肚歸 行著有時大心愧 一箇腹肚圓錐錐 八月花胎肚凸凸 早暗代志著知防 這號干苦不敢廣 失頭著叫人罩摸 九月花胎兮振動 為著病子不成人 花粉減抹歸斗籠 無食腹肚亦未空 一家大小亂亂返 各人少想抄頭毛 摸著查埔說有秧 歡喜趙破三塊磚 生著查某面憂憂 一箇面孔打結球 戥戥彩彩罔從就 無省卜恰人應酬 生了三日做完滿 油飯厝邊倖一盤 戇尪看見塊流涎 治塊想卜食雞肝 三日做了做滿月 油飯無到閣再炊 戇尪愛食不敢說 伸手來塊捻雞皮 滿月做了四月日 戇尪想卜食雞翅 一日無想卜作失 好呆恁廣袂朝直 閣無外久做度祭 看見戇尪真笑科 歡喜有了袂曉說 一日親像狗吹螺 一歲二歲手裡抱 三歲四歲塗腳趖 生著查某無省好 驚了別日做彪婆 五歲六歲漸漸大 有時頭燒甲耳熱 就討靈符來乎帶 看到腰子真受磨 七歲八歲真肴炒 一日顧伊二枝腳 那是不縛就卜打 調督即袂做爭差 九歲十歲教針子 驚伊四繪去庚糸 一日都著教袂是 有嘴廣申無嘴舌 十一十二著打罵 只去著那學做衫 不通食到卜做媽 手野不八提菜籃 十三十四學煮菜 一塊面棹辨兮來 別日即有好尪婿 不學到時汝著知 十五十六卜返大 驚了塊人去風花 別日卜捧人飯碗 即下孝敬乾家官 十七十八做親成 一糧歡喜一糧驚 去那有緣得人痛 瓊真起來真無長 飼著有孝查某子 三分代志返來行 是伊麻油菜子命 提來物件歸大廳 飼著不孝查某子 親成五什人人驚 開嘴著卜討物件 無論多少葉塊行 有孝查某行做前 出山倩人夯龍鐘 報答親恩真敢用 吩咐鼓吹倩香亭 不孝查昧真正敢 一箇親像破菜籃 來到卜甲人相罵 少想卜來討麻衫 有孝查某有情份 刁工閣來做三巡 听伊塊哮無宿困 卜硯籃拔報親恩 不孝任無惜本份 無用閣卜想通春 食到汗流無宿困 少想偷侃人衫裙 有孝跪塊一直哮 不孝也無目滓流 有孝等候燒靈厝 不孝查某嫌箱久 有孝查某來寄庫 不孝偷提馬茶蘇 有孝查某是真苦 不孝愛食大腸圓 父母痛子在心頭 子孝父母放水流 尋無幾箇想兮到 兮曉順情來行孝 父母生子干苦代 有孝兮人天地知 養育深恩親像海 尿心報答即應該 眾人來听今著散 听到即久無因單 乎恁父母耳耳看 心肝親像打算盤 (十月花胎歌 終) |