佇(在)過去的生活經驗內底，相信大多數人攏有即(這)款的感覺，著是台語(指河洛話)是粗俗的、無水準的。伊是一種方言、是無文字的、袂(不能)當用來創作的，所以台語是無文學作品的講法…。尤其自細漢開始，佇學校讀冊的過程中間，教育機關從來不捌(不曾)有台語文的教學，嘛更加不捌讀過台語文的文章，所以潛意識內底，感覺台語若用來凊采(隨便)講講猶佫(iau-goo還可)會通，但是若卜(要)成做文學作品，就「阿婆也生囝」─真拚咧。台語無啥乜(什麼)文學作品，這是一般人學習認知無夠，所產生的誤解。

其實佇西元1566年(明．嘉靖45年)，咱的祖先就已經有用台語文創作「荔鏡記」的劇本，即個劇本屬於南管的戲文，內容描寫陳三、五娘的愛情故事。另外有男女對唱的七字仔─褒歌、歌仔戲戲文、布袋戲戲文、皮影戲戲文、一千四百外種的歌仔簿(比如：周成過台灣、運河奇案)、地方民謠(比如：南光調、花鼓調)、囡仔歌(比如：打馬膠、白鴒鷥)…。咱唯(ui從)1566年的「荔鏡記」算起到今仔日(今天)，台語的民間文學歷史已經超過四百外冬。遮個(這些)台語民間文學，會使(可以)講是台灣現代文學的肥底。尤其男女對唱的「褒歌」「七字仔」是台灣歌詩、現代詩的活水。「南管戲文」是台灣戲劇、小說的源頭；佇本土文化受重視的今仔日，滯(住)佇即塊土地的「台灣人」(認同即塊土地的人)，袂(不能)使對遮個寶貴的文化遺產，目睭放瞌瞌(kēh閉著眼晴)，喙(嘴)激恬恬(gēk-diām-diām嘴巴閉著)，頭殼內一片空白，若安爾(這樣)著枉費做一個有「文化」有「尊嚴」的台灣人。

「褒歌」佇民間嘛叫做「七字仔」、「山歌」、「閒仔歌」、「採茶歌」等講法，是三、四百冬來長期流行佇(在)台灣民間各所在，表現男女感情的台語歌詩，伊是台語文學的源頭，亦(也)是本土文化的基礎。莫怪佇日據時代(1927年)，「台灣藝苑」即本刊物，著用「台灣國風」即個名詞，來稱呼遮個(這些)褒歌，以表示肯定、呵咾(讚美)褒歌的意境深遠、用詞典雅、內容通俗、技巧高超等文學價值。咱攏知影，佇中國文學內底，上古典的文學詩集，著是「詩經」，即本被稱呼做五經之一的經典「詩經」，伊的內容分做「風」、「雅」、「頌」，其中上蓋有文學價值的是十五「國風」的部份，是三千外年前流行佇中原地區的民間歌謠，唯(從ui)遮個歌詩內底，會當看著中原地區各所在的風土民情、男女思慕、悲喜等的情懷。共款的意思，「台灣國風」嘛是台灣民間的歌謠，描寫記錄台灣古早查甫、查某佇都市、莊跤(鄉下)勞動、港邊碼頭夯(ghiă扛)貨、田園種作、茶山挽茶，互相對答，來表現男女意愛、相思、悲喜佮台灣民情風俗的「歌詩文學」。

「台灣國風」的特色除了內容是描寫台灣「風土」人情佮「諷誦」歌詩以外，伊的形式固定是四句，叫做「四句聯」；每一句攏以七字來表現，叫做「七字仔」；每一句攏押韻，叫做「全鬥句」，另外用字相當的自由，不(˜)免講求平仄、不免講求對句，無受格律的限制，尤其表現出生活化、趣味化的風格，互人感覺足親切，遮個特色會使講比「詩經─國風」、「唐詩─絕句」無卡(較)輸。咱若對台灣早期的褒歌有深入的了解，對台灣本土文化著會有所喜愛。下面介紹台灣文學上有代表性的「台灣國風」的歌詩─褒歌，互逐家作伙來鼻芳、來分享。

一、 古典性的褒歌
★半暝月娘
半暝月娘入紗窗，(tang)
偏偏照我守空房，(băng)
關窗將月緊緊送，(sang)
送去隔壁照別人。(lăng)

★千里路途
千里路途無嫌遠，(hňg)
見面親像蜜攪糖，(tňg)
苦不時鐘行倒轉，(dǹg)
好話未講天先光。(gng)

二、趣味性的褒歌
★門口一叢
門口一叢相思叢，(căng)
想思病落不知人，(lăng)
先生來看講無望，(bhăng)
搭心來看好噹噹。(dang)

★為娘掛吊
為娘掛吊桃花痟，(siàu)
倒落床中直條條，(liău)
朋友若來真見笑，(siau)
起來無枴徛袂椆。(diău)


三、文學性的褒歌
★娘心親像
娘心親像月光冥，(mĭ)
君心親像烏暗天，(tiⁿ)
娘用真心對待汝，(lì)
君像蜘蛛吐毒絲。(si)

★蓮藕拍斷
蓮藕拍斷會牽絲，(si)
菜瓜辿藤密密纏，(dĭⁿ)
中意入心難分離，(lĭ)
相好不是一半年。(nĭ)

四、民俗性的褒歌
★含笑拍莓
含笑拍莓大細蕊，(lùi)
鴨母落田雙跤開，(kui)
我娘生緣免生水，(sùi)
八字有合拆袂開。(kui)

★一尾好魚
一尾好魚不食釣，(dioo)
走到江中尾直搖，(iŏo)
掠汝袂著互汝笑，(cioo)
堅心做網拋甲著。(dioh)


五、生活性的褒歌
★阮庴店佇
阮庴店佇娘厝後，(āu)
不時看娘咧探頭，(tău)
情意總有九分九，(gàu)
路邊相撞頭勾勾。(gau)

★竹筍離土
竹筍離土目目柯，(gua)
土頭開花釘落沙，(sua)
身邊無娘通倚帶，(gua)
一心想死恰快活。(uah)