下 課 囉

06/01/2003修訂

今仔日透早第一節上數學課，阮老師佇臺仔頂講甲喙角全波，班上的同學嘛攏足認真咧聽課，毋過(gu/gor)一向對數學頭疼的我，雖然袂當講是「鴨仔聽雷」，煞感覺規個人懶絲、懶絲，當聽甲無啥趣味的時，我偷偷仔看出窗仔外，看著一陣佇外口喝甲大細聲的學生囡仔，原來怹咧上體育課，即時陣我的心嘛已經飛出去外口囉！心內想—假使上課會當像「哈麗波特」仝款，教一寡「魔法、咒語、擱騎著掃帚四界飛」，哇！毋知有偌(外)心適的！飛啊！飛啊！忽然間- - -咦？頭殼假那有撞著啥物物件足痛的，斡頭一下看，毋知啥乜時陣老師已經氣噗噗徛佇我面頭前，兩蕊目珠親像「暗光鳥/貓頭鷹」掠我金金看；一寡同學笑甲東倒西歪，我歹勢甲想卜鑽入去塗空，好佳哉—無偌久的時間，下課的鐘仔聲霆囉，我親像拄著救星。即時陣大部分的學生仔親像野馬一般，放開了予人束縛的索仔，直向外口走出去。予本來恬靜的校園，一目瞬仔煞鬧熱滾滾！

老師叫我送資料去辦公室，我著親像「巡邏兵」一層一層巡視，經過一、二年的教室時，看著一陣猴仙仔親像「孫悟空」下凡四界亂撞，有的擱走去操場附近的空地仔掠「草螟仔」抑是掠「肚拐仔」，有的煞佇教室裡比賽「戰鬥陀螺」，逐家爽甲面青面綠，看啥人上有氣力。莫怪古早人會講：「先生無佇館，學生著起海反(hùan)。」

三、四年的學生仔有的佇教室裡行棋，邊仔咧看仔人卻是十喙九尻川，一句來一句去，完全袂記得「觀棋不語真君子」。另外卡恬靜的查某囡仔著無像囉！怹恬恬仔佇教室裡看冊、開講，有的同學佇走廊「踢毽仔」，看啥人跤底抹油卡滑溜！

行到六年的教室，看著一寡生龍活虎的查甫囡仔佇籃球場咧表演怹的球藝，「灌籃」成功—哇！逐家大聲細聲喝甲連十八里外的過路人攏嘛停車落來加油哦！卡細漢的囡仔無法度搶著球，只好拍人喝救人囉！另外教室裡有一個大姐頭仔咧彈風琴，邊仔圍著一堆的同學佇遐(hia)唱歌，唱出來的歌聲真美妙！即時陣我看著阮阿姊佮伊的死忠的佇教室的另外一爿咧話仙，擱一面咧食喙食物仔；我走去共伊討一塊糖仔來揳(sè-)喙齒縫。最後將文件送去辦公室，完成老師交代的任務，忽然間我想著一個昨昏媽媽講予我聽的笑話，我趕緊三步做兩步卜轉去教室，佮(gà-)我上好的朋友分享。啥知，上課的鐘仔聲又擱霆矣，我嘛已經走甲「會呼(kō-)雞袂歕火囉」，等一咧下課，我一定卜講甲予逐家笑甲喙仔離獅獅！

下課十分鐘感覺有卡短淡薄仔，但是逐遍攏爽甲足歡喜的，雖然有時會感覺無夠氣(kui)，但是這个沓沓滴滴的互動，我相信攏是日後甜蜜的回憶，同學之間的感情，嘛是佇這短短的時間，慢慢仔的累積佮培養起來；我愛珍惜佇小學最後一冬的時間，上課的時好好學習，而且期待每一個下課歇困佮同學互動快樂的時間。