地動來的時陣

09/19/2002修訂

俗語講：「人佇厝裡徛，禍(hōr)對天頂來。」代誌雖然已經過了三冬外，但是到即碼想起來，跤(腳)手仔嘛擱驚甲皮皮顫(cūah)，心情袂快活。

迄(彼)暝，我佮平常時仔仝款，共(ga-)阿爸、阿母講晚安了後，轉去家己的房間，倒佇眠床睏，無一搭久仔，著睏甲毋知人去。當(d¤g-)咧落眠做夢的時，忽然間，予一陣驚天動地的地動拍醒，感覺天昏地暗，進入世界末日仝款。門窗弄弄叫，親像咧催戰鼓一般；壁堵發出嗶剝嗶剝的聲音，強卜必(bīh)--開。經驗提醒我，「事情不妙！地牛大翻身囉！毋知卜(be-)死偌濟人呢？」緊囉！「三十六計，走為上策。」一向驚暗的我，毋知佗位來的勇氣，不管三七二十一，一下仔囝著衝出去。佇樓梯口遇著阿母，一頭挵(long-)著阿母的胸崁，就安爾驚甲大聲哭。「一、二、三、四，驚著無代誌，佛祖來保庇！」阿母安慰我即個著生驚的囡仔囝。

厝繼續咧搖，阿爸喊 (hiàm-)阮趕緊離開房間。阮五步併做三步，衝到大門口，哇！人馬插插(cà cāh)，個個攏像拄仔對(ùi-)鬼門關逃命出來仝款，驚甲一個面仔青損損。「驚死人！食甲迹大漢，毋捌看過迹爾仔大的地動！」「阿明啊！緊出來啦！」「予雞驚，予狗驚，予十二生肖驚，予阮嬰仔毋免驚。」阿媽著安爾踅踅(seh-)唸。有的搭胸硩(dè-)驚，有的四界揣厝內的人，有的戇戇(gāng)坐佇塗跤，原本恬(diam-)靜的街頭，一時煞比菜巿仔擱卡(較)鬧熱。

第二工，新聞報導，即場世紀的大地動，造成嚴重的損害，損失無法度估計。人家厝佮大樓倒去不計其數，受傷死亡人數千千萬萬。對(ùi-)電視畫面上看著災區一片(pian)厝倒人死的慘境，有的親人生死不明，予人看著肝腸寸斷。人生真是無常，一夜之間，造成台灣四界家破人亡，這是人間的大悲劇？人人感嘆：天公伯仔，心肝那會赫爾硬。

阿母趕緊去佛廳燒香拜拜，感謝神明佮祖先的保庇，予阮規家伙仔大小平安無代。嘛祈求菩薩保庇硩(dè-)佇塗跤的受難者，會當早一日平安順利無代誌。

俗語講：「人害人天毋肯，天害人在眼前」。即場921世紀大地動，是大自然大展神威，大聲警告人類毋是伊的對手，所以毋通擱講大聲話：「人定勝天」濫糝(烏白)破壞大自然的景觀地理，人愛謙卑學習佮大自然和諧(hăi)相處，對土地愛有疼心，這才是萬年久遠的作法。

佇即遍世紀大地動的事件當中，上安慰的是，台灣人充分發揮同胞愛、手足情，逐家心連心、手牽手，有錢出錢，有力出力，一陣一陣的志工，上災區鬥跤手，一車一車的救濟品，送往災區，人性的光輝再一次被發揚光大，這才是台灣人無形的資產。

「天有不測風雲，人有旦夕禍福。」天搖地動(tiⁿ iŏr dē dāng)的時陣，汝的心情是啥款？是絕望？也是六神無主？毋免驚！毋免驚！地動雖然是做天代，是天災，但是咱若學一寡撇(piat-)步，著會當確保性命、財產的安全，佇遮卜提醒逐家人是：佇緊急的時刻，袂使(sai-)青狂，千萬愛保持冷靜，採取有效的避難方法。若安爾著親像「土地公毋驚風颱─老神在在」

i. 地動的時陣，覕踮(diàm-)桌仔腳，抑(或)是壁角，毋通走出去外口，才袂予落落的看板(kăn bàng)等敲(kà-)傷。

2. 袂使接近有玻璃的所在，以免割傷。

3. 電火爐、電器等會記得關掉。毋通點番仔火、lài dāh(light)，恐驚會引起瓦斯爆炸。

4. 地動的時隨時有可能會失電，所以儘量勿(mài-)坐電梯。

5. 佇公共場所人濟的所在，毋通拚命向大門口衝，尤其是囡仔，真容易予人群踏死。

6. 厝裡平常時仔加減準備一寡緊急的物件，比如手電仔、飲料、乾糧、藥箱等。

「一更報喜，二更報死。」人命脆脆，啥人攏法度預料下一遍地動佇啥乜所在、佇當時會來發生，更加無法度阻擋地動的來臨。咱會當做的是：「好天愛存雨來糧，免得到雨來著無思量。」恁講，是否？