我的好朋友

06/01/2003修訂

俗語講得好：「佇厝靠父母，出外靠朋友」。一個人若無朋友鬥陣、互相幫忙，是真困難佇社會佮人徛起。古早人講：「一牽成、二好運、三才情」，著是咧講「一個人卜成功，除了個人本身的才調佮能力以外，擱卡重要的是愛有朋友的幫贊、牽成才會當達成目標」。當然啊！咱愛交好朋友才會當互相鼓勵、鬥跤手；假使若交著歹朋友，一世人可能著予伊毀掉囉！所謂「近朱者赤、近墨者黑」著是即個(ē)道理啊！今仔日真歡喜，我卜利用即個機會，來紹介我的好朋友，予逐家識似！

我上好的朋友是叫阿娟(仔)，佇班上阮兩個人的成績攏差不多，但是阮從來毋捌相爭第一名，更加袂因為成績拍歹感情；反倒轉阮會互相鼓勵，互相研究佮學習。所以人攏講阮兩人若像姊妹仔，互相分享對方的快樂佮分擔對方的憂愁，有時嘛會做伙作夢，計劃將來的願望。阿娟是我三年到六年的同學，阮有真正的友情，所以會當互相體諒、互相扶持。但是有當時仔喙齒嘛會咬著舌，有一遍兩個人討論一個問題，因為意見袂合，紲諍甲頷仔頸筋浮浮浮，連紲兩三工無愛佮對方講話，啥人都毋認輸，雖然我擱有其他的朋友通鬥陣，但是規日人感覺癉篤篤(dāuh)，我看即聲是「火燒罟寮—無望(網)仔」，我只好去共伊會「失禮」，伊嘛共我「坐(ce)毋著」；阮的感情著親像「土地(di-)公毋驚風颱─老神在在」，自迄遍了後阮兩人的感情擱卡親密囉！

有一冬的過年時，我去怹兜揣伊cit迌（玩耍），因為阮老爸予我硩年錢，我歡喜到著，一吱喙煞吱吱霆(dăn)，但是我看阿娟親像「啞口食黃蓮─有苦難言」，一時煞無話無句，我才想著怹兜是「單親的家庭」干礁伊佮怹阿母蹛做伙(夥)，我一時失言，以後我著盡量減講厝裡的代誌囉。其實伊毋定(不但)功課好，擱是運動選手，不管卜走、卜跳，攏是班上的一級棒，會使講是一個「文武雙全」的人，使我更加欽佩伊。會記得，有一遍上體育課，老師卜考籃球，一向無運動細胞的我，一時毋知卜如何是好？好佳哉，我的好朋友阿娟，利用下課的時間趕緊替我惡補，予我會當輕鬆過關，老師講我「烏矸仔貯(de-)豆油」，我笑甲喙仔離獅獅，因為我有一個好朋友做靠山。

我擱有一個好朋友，為什麼愛特別介紹咧？因為伊是我第一個查甫朋友，恁一定感覺真好奇？聽我慢慢仔說來--佇學校裡，因為阮參加仝一個社團，鬥陣的時間卡濟，伊常在會教我一寡撇步，親像卜安怎將演講稿卡緊背熟、卜安怎合作共同完成一件代誌。但是三不五時嘛會佮對方「答喙鼓」、相爭「喙食物仔」，毋過到尾仔攏是我嬴，因為伊講：「有風度的查甫囝袂佮查某囡拚輸贏」，伊予我學著兩性和諧相處的道理。

好朋友會當佮咱鬥陣一世人，親像兄弟姊妹仝(gang-)款；交著好朋友不但予我的生活較充實、快樂，嘛佇我鬱卒的時，鼓勵我、安慰我；「好朋友」已經是我生活中重要的一部份，我愛珍惜即份好朋友的感情，佇我成長的過程中更加順利佮快樂。