我上愛遊玩(佚陶)的所在

2003.06.01修訂

「坐飛機看天頂，坐火車看光景，坐大船看海湧…」，「人生可比是海上的波浪，有時起有時落…」。

海墘仔是我上愛佚陶(cit tŏr)的所在。講著(diorh-)海墘仔，我有規牛車(厝間)的話，小朋友，恁敢有想卜知影？請恁恬恬仔聽，聽我說分明。

阮阿爸愛看海，受著阿爸的影響，所以我自細漢就真捷(ziap)去海邊仔傸(sng-)水。比如台南的七股、高雄的旗津、甚至台北的八里、台東的綠島，攏有阮父仔囝的跤跡。逐擺看著一波峘過一波的海湧，欣賞大自然海湧所演奏的交響樂，尤其是佇柔軟的沙埔仔散步，這會使講是人生一大享受。

七股潟(sik/sià)湖是逐家攏真熟似的所在，除了看烏面撓抔、花跳(hūe-tiāu彈塗魚)，上蓋好傸的是掠大拱弦(毛蟹)。若洘(kor-)流的時，沙頂的海和尚(蟹)趖甲滿四界，包領汝掠走袂離。選一位(跡)沙堆挖落去，愛較細膩，若無雄雄狂狂(hiōng hiōng gōng gŏng)走出來的蟳(zim5蟹)仔，會害汝逐(riok-)甲捙畚斗，腰閃腳跩，前氣接袂著後氣呢！

旗津海岸公園嘛是真好傸(sǹg)的所在，遐有青piāng piāng的樹欉，四界攏是有藝術味的景致。日頭佇卜落山的黃昏時，正是「大腸告小腸」腹肚枵(iau)的時陣，看著生理交易(gā-iah)的海產店，所賣的海產一盤一百箍(元)，俗擱大碗，大碗擱滿墘，一下仔手，幾外盤的海產著落佇腹肚底。

如果汝若卜抾(撿)蜊(lā-)仔殼(貝殼)，我偷偷仔共汝報，台南鹿耳門溪口是上適合的所在。毋過提醒各位，千萬毋通貪心，抾規大堆，若無「食緊弄破碗」，免偌久蜊仔殼著會無去矣！

汝看！白色的沙埔一望無際，非常醒(hiaⁿ-)目。沙埔仔真濟遊客，有的拍球，有的疊沙，人人喙笑目笑、個個歡頭喜面。一支一支五彩(艷麗)的雨傘，親像一蕊一蕊的花開佇沙埔項，將海埔仔佈置甲親像彩色的世界，多采多姿。

海面上，白色的海湧親像咧開運動會仝款，一波比一波衝(cìng-)卡峘(高)，一陣比一陣卡旺聲。「轟轟！」響亮的歌聲勝過國慶日的樂隊。遠遠看會著所的海中，有幾隻船仔隨著海湧進行，毋(不)知載著啥(誰)人？卜駛向何方？一時歡喜，我綴(隨)著波浪的起落，佮伊走相逐(掠)，一時無水心，衫仔褲予海水噴(pùn-)甲澹(dām)漉漉。規氣坐落去海面，規身軀接受海水的洗禮，人浸佇海中感覺清涼無比，心裡的操煩嘛攏洗甲清氣噹噹。

傸了悿(tiàm)的時，著自由自在倒佇沙埔，舉(ghiah-)頭看天頂的白雲千變萬化。有時看起來像古錐細隻狗仔，有時像溫柔的兔仔，有時化做獅、虎、豹、象、龍的時，著親像佇動物園咧參觀仝一款，實在誠心適，大自然真正是誠神奇。

最近我去海邊仔，看到沙埔仔四界全是糞圾，我的心情親像坐「溜籠」仝款，心肝頭結規毬(giŭ)。真無釆！原本是嫷噹噹的姑娘，煞生甲滿面的黑斑、雀斑、痘仔子，看著真毋甘？這是因為有的人一時取方便，無顧別人的利益 煞將青翠的寶島、美麗的海洋，破壞甲離離落落，真是使人怨嘆。→即段內容會使考慮取消。

在即個熱怫怫的天氣，日頭假那火燒埔，囡仔兄、小朋友，毋通覕(bì-)佇厝內吹冷氣，緊啦！樓頂招樓腳，阿母招阿爸，鬥陣來去海邊仔，保證予汝心涼脾透開，喙仔笑嘻嘻。

我上愛遊玩的地方

「白浪淘淘我不怕，張穩舵兒往前划….」。海邊是我上愛chit⁴ tho⁵ 的所在。講到海邊，我有規厝間的話，小朋友，請您惦惦仔聽。

我阿爸愛海，受到阿爸的影響，我自細漢就足ciab8去海邊仔透氣。親像台南的七股、高雄的旗津、甚至台北的福隆、台東的綠島，攏有阮父仔囝的腳跡。欣賞大海的澎湃，聆聽洶湧的海濤，漫步柔軟的沙灘...，真是一大享受。

七股潟湖是大家攏熟悉的所在，除了看黑面琵鷺、彈塗魚，上蓋好耍的是抓蟹仔。遐退潮時，沙頂的和尚蟹仔舖舖舖，比屎學仔蟲閣較濟，驚天動地。選一個小沙堆挖落去，嘿！較細二哦！若無hiong5 hiong5 kong5 kong5 跑出來的蟹仔，會害你ziok4 佮車畚斗，腰閃腳跩，頂氣接不著下氣呢！

旗津海岸公園嘛是真好耍的所在，遐有青phiang4 phiang4的樹ng2，充滿藝術味的造景。夕陽西斜，「大腸告小腸」，海產一盤一百元，大碗閣滿墘。

如果你欲撿貝殼，我偷偷仔佮你講，台南鹿耳門溪口是上適合的所在。毋過提醒各位，不倘貪心，檢佮規大堆，若無「食緊弄破碗」，免若久貝殼就斷種唉！

你看！白色的沙埔一望無際，非常醒目。沙埔頂真濟遊客，有的打球，有的砌沙，個個喙笑目笑。一支支鮮艷的太陽傘，親像一蕊蕊的花盛開佇沙埔項，將海埔仔點綴得多采多姿。

海面上，白色的浪花在開運動會仝款，一波比一波高，一陣比一陣響亮。「轟轟！」雄壯的歌聲勝過國慶日的樂隊。遠遠的海中，幾艘船仔隨波飄浮，不知載著誰人？欲駛向何方？我邁開腳步，跟著浪花追逐，海水濺溼了我的衣裳。索性坐下來，全身接受海水的洗禮。海水拍佇身軀，清涼無比。等浪花退後，柔細的沙蓋住了我的身軀，腦海不禁浮現傳說中的美人魚。「啊！」一不小心，另一個浪花沖過來，洗去身上的泥沙，嘛將心裡的煩憂攏總沖走。

堆沙堡也是真趣味。選一個地點，讓你的思緒儘情揮灑。我最得意的作品是「哆啦a夢」，圓滾滾的身材，好可愛啊！你愛刻什麼呢？

玩累了，躺在沙埔，抬頭看天頂的白雲千變萬化。有時像可愛的小狗，有時像溫柔的白兔，當它幻成惡龍時，我幻想自己是勇敢的騎士，揮著我的寶劍，要為民除害。

俗話講得好：「好花不常開，好景不長在。」最近我去海邊仔，看到沙埔頂四界是垃圾，我的心情親像坐溜梯仝款，心肝頭結規giu3 。可惜啊！原本隋噹噹的姑娘竟然生佮滿面的黑斑、雀斑、痘仔籽，怎不使人怨嗟呢？在此奉勸大家，去海邊仔遊玩，千萬不倘留下任何東西，除了歡歡喜喜的回憶，您講好嗎？

在這個熱呼呼的天氣，日頭甘那灶頭火，小朋友，不倘 bi4 佇厝內吹冷氣，緊啦！樓頂招樓腳，阿爸招阿媽，逗陣來去海邊仔，保証乎你心涼脾肚開，快樂捻(lian2)喙鬚。