下雨天

06/01/2003修改

睏甲當(d¤g)落眠的時，忽然間予外面霹哩啪啦的雨聲吵醒。哇！落雨矣(a^o)！一目瞬仔雨著(dorh)停囉！本來想卜擱繼續睏，但是眠床頂的鬧鐘仔煞放送「美麗的音樂」共(ga-)我的睏神趕走。拍開窗仔看外口，天色猶原暗趖趖(sŏr)，假使今仔日若是禮拜，我一定擱繼續bè(h)我的枕頭山。其實即個時陣我的心情佮外口烏天暗地的情景拄好倒反(bìng)，趴佇窗仔前準備卜來欣賞一首「交響樂」，果然不出所料，無偌(外)久雷公、熾爁(sì-na)佮烏雲，作伙演奏出「英雄交響曲」，一目瞬仔囝，大粒、細粒的雨水開始怹的旅行。我的心情著親像海湧咧捙跋反(ciā-buah-bìng)仝款；自細漢著愛落雨天的我，即時陣看著雨水滴落樹葉仔頂，若像咧跳芭雷舞；忽然間我想起細仔漢仔的時，阿母教我唱的一首歌—「西北雨直直落，鯽仔魚卜娶某，鮕呆兄拍鑼鼓，媒人婆也、塗虱嫂，天色暗揣無路…」。

阮阿母足愛佇落霎霎(sap-)仔雨的時，舉(ghiah)雨傘，牽我佮小妹的手佇雨中散步，伊講：「足濟有名的文學家、藝術家，怹的靈感攏是對(ùi)落雨天來的。」我聽甲霧煞煞。我目珠金金看著雨水一直落(lorh)--落來，愛搞怪的我，牽著小妹開始走去傸(sng-)水，頭毛佮衫仔褲攏予雨水沃甲澹(dām-)糊糊，擱毋願轉去，一直等到阿爸舉竹仔枝來共阮掠轉去，阮才毋情毋願慢慢仔綴(dùe-)阿爸的跤步行--轉去。

細漢時陣我常在去庄跤看阿媽，因為阿媽徛厝的頭前有一片的埕斗，會當曝栗仔；尤其，逐遍若落雨的時，著積一大堆水。哇！即個時陣阮一陣(din-)囡仔著開始提紙摺船仔比賽，等到所有的人攏摺好了後，著(dorh)開始比賽看是「虎克船長」、抑是「小飛俠」卡(較)厲害，紲落逐家攏有怹的夢想- - -；有當時仔厝頂的雨水滴落來，會佇戶蹬跤(ka)開一條溝仔，雨水若大陣的時，溝仔水著會流甲足緊，雨水卡小的時，溝仔水著慢慢仔流，這又擱有無仝款的傸法囉！所有的船隻，等待船長一聲號令，大隻細隻的船仔開始出航，有的馬上反船、有的兩隻走相掠、有的是頭尾結(gat-)作伙，拆袂開- - -，阮遮的囡仔伴攏傸甲毋知人！遮的沓沓滴滴予我的囡仔時代增加了真濟記憶，嘛編織了真濟夢想！

我愛落雨，尤其佇心情鬱卒的時，更加希望來一陣大雨，即个時陣天公伯仔親像會瞭解我的心情，聽會著我的心聲。將伊的雨水共我所有的痛苦、煩惱洗甲清氣、清氣；等雨停矣，我的心情嘛佮虹(kīng)仝款，又擱是嫷噹噹的一工。

「水」佮咱的生活是有相當密切的係，「雨」擱是水的源頭，伊賜予萬物性命，予萬物會當生湠(tuaⁿ)，尤其佇翕(hip-)熱的天氣，若是來一陣西北雨，共所有的花草洗身軀兼換新衫，規個大自然那像脫胎換骨一般，人嘛綴咧輕鬆起來。莫怪咱的俗語：「天無雨，人無步 」，這著是教咱人愛佮大自然和諧相處。