【修訂】

各位評判先生、各位來賓、各位同學、逐家好：

今仔日我所卜講的題目是「落雨天」！「落雨天」！

落雨天是大自然的一款現象，不管是大雨、霎霎(sap)仔雨、西北雨抑是風颱雨，攏有無仝款的情景，嘛會予人無仝款的心情。自古以來著(dorh-)有濟濟的詩人佮作家用怹(īn-)的心情來描寫落雨天，也因此流傳千古。我是囡仔人，看落雨天嘛有我家己(dī)的看法，即碼我著來紅目趶(u)仔鬥鬧熱。

會記得有一冬的熱天，阿母喊(hiàm)我佮阿兄去睏中晝，我姑不貳將，只好乖乖仔去睏，不過倒規晡嘛睏袂去，等阿母睏落眠了後，我偷偷仔騎著自輾車出去外口踅踅咧！雖然無風無搖，天氣真翕(hip)熱，毋過，無迄種赤焱焱的日頭共我曝，嘛是袂bhài的代誌喔！我越若騎越若唱歌，心內當咧歡喜的時，無張持，頭殼頂煞滴著水，舉頭共看，敢是冷氣的水？嗯！假那毋是，毋插伊，緊來去佚陶(cit-tŏr)卡要緊。咦！擱一滴、二滴、三滴，愈來愈濟，滴甲打馬膠路親像豆仔點的布匹仝款，雄雄「嘩」一聲，落雨矣(a^o)！

我趕緊騎入去亭仔跤覕雨，路裡的人嘛惶惶狂狂揣所在宓雨。亭仔跤覕真濟人，有老人、少年个、騎車个、行路个，猶擱有我即個偷走出來佚陶的囡仔。雨是愈落愈大，斟酌共看，雨落佇打馬膠頂，那親像開出一蕊一蕊的水晶花，金爍爍(sì-sīh)，心肝內想講若會當挽一蕊送予阿母，毋知有偌仔好咧！忽然間，一台轎車真囂俳駛過去，共水噴甲滿四界，煞來叫醒我的美夢。看著一對愛人仔舉著一支小雨傘，因為即陣雨，予怹倆人黏作伙，情甘蜜甜是講未煞。上可憐的是一隻流浪狗，過路人攏毋予伊覕踮門口，大聲共趕走，罵伊是癩膏狗，袂當覕雨的流浪狗，只好狗頭犁犁，繼續佇雨中寬寬仔行，毋知是咧哭抑是咧吼？

雨漸漸仔細陣，一寡無雨衫通穿的人，ō-do-bhài起動，著卜向前衝，存範(辦)佮雨拚輸贏。干那迄位阿姨，自宓雨開始著手機仔講袂煞，管伊雨是大滴抑小滴，只要有話通講著歡喜。講到這，才想著我阿母毋知有去予雨聲拍醒無？萬一若揣無我，恐驚仔，後果不堪設想，到時我著食竹仔枝炒筍絲，想到遮，著趕緊騎著自輾車，拚命衝轉去厝，一、二、三、四，驚著無代誌，好佳哉，阿母猶擱咧睏。

即遍雖然拄著落雨，袂當好好仔四界傸，毋過，因為遇著落雨，予我有無仝款的心情，嘛體會著老師教予阮的兩句俗語「烏雲飛上山，鬃簑提來幔」佮「出門看山勢、入門看人意」的道理，咱的祖先確實有智慧，我愛好好仔學習。我就講到這，多謝！努力！

【原稿】

各位評判先生、各位來賓、各位同學、大家好：今仔日我所卜演講的題目是「落雨天」

落雨天是大自然的一款現象，不管是大雨、sap sap 仔雨、西北雨或是風颱雨，攏有不同款的情景，嘛會給人不同款的心情。自古以來就有真濟詩人作家用他們的心情來描寫落雨天，寫出一篇擱一篇的好文章，我是囝仔人，看落雨天當然嘛有不同款的心適和趣味。

會記得夏天有一天，阿母趕我和阿兄去睏晝，我孤不二三衷，只好乖乖仔去睏，不過倒歸撥嘛睏袂去，等阿母睏落眠之後，我偷偷仔騎著自輪車卜來去撈撈咧！雖然無風無搖，天氣真悶熱，毋擱，沒迄種赤炎炎的日頭給我曝，嘛是不錯的代誌喔！我邊騎邊唱歌，心內當咧歡喜的時，無張持，頭殼頂滴到一滴水，抬頭嘎看，甘是冷氣的水？嗯！干那不是，不睬伊，緊來去七桃（遊戲）卡要緊。咦！擱一滴、二滴、三滴，愈來愈，滴甲點馬膠路親像豆仔點的布匹同款，雄雄「嘩」一聲，落雨啊！

我趕緊騎入去亭仔下宓雨，路裡的人嘛惶惶狂狂走入來宓。亭仔下宓真濟人，有老人、少年兮、騎車兮行路兮，丫擱有我這叻偷走出來七桃ㄝ囝仔。有的騎車兮，稍亭入來雨衣穿穿咧，的擱繼續騎入去不知卜落多久的雨裡。雨是愈落愈大，落佇點馬膠開出一朵一朵ㄝ花蕊，親像水晶花，金褶褶，若準ㄝ當挽一蕊給阿母，毋知有多好咧！忽然間，一台轎車真搖擺駛過去，把水噴乎懸懸，煞來打斷我的美夢。看到一對愛人啊舉著一支小雨傘，因為這陣雨，乎因倆人行相倚，情甘蜜甜是講未煞。上可憐ㄝ是迄隻流浪狗，人攏毋乎伊宓踮門口，卡緊甲伊趕乎走，罵伊是癩立狗，無湯宓雨ㄝ流浪狗，只好頭仔犁犁，繼續佇雨中款款仔走，毋知伊是ㄉㄝ哭抑是ㄉㄝ號？

雨漸漸仔細陣，一寡無雨衣通穿ㄝ人，發動摩托車，準備補衝乎行，村伴（準備）甲雨拼輸贏。干那迄位阿姨，自宓入來就手機仔打無離，管伊雨是大滴抑小滴，只要有話通講就歡喜。

講到這，才想到我阿母毋知有去乎雨聲打醒無？趁即馬鑽雨縫，緊來轉。雖然因為落雨，無法度擱去七桃（遊戲），不過，嘛因為落雨，乎我有不同款ㄝ體驗和心情。騎著自輪車，清風微微仔吹來，小雨綿綿仔渥佇面，嗯！有夠秋凊ㄝ落雨天。我就講到這，多謝！魯力！