好文章讀出聲，予別人聽
dang hōng-zing
俗語講：「酒逢知己飲，詩向會人吟」，「字是隨身寶，財是國家珍」。佇遮(zia)「詩」、「字」攏是指好文章的意思。文章是用文字來表達一個人的感情、思想、知識的方式；講話、朗誦、座談，嘛是另外一種用口頭來表達感情等的方式。所以好文章讀出聲，予別人聽，這是一種表演，親像有人用唱歌，演奏、美術等方式，聽的人、欣賞的人攏是一種享受；講的人、表演的人嘛會得著足大的成就感。
「好文章讀出聲，予別人聽」，即(zit-)句話若特別用來指母語─台灣話，更加是一句上適當的話。俗語講：「講話那(na-)像咧唱歌」，這是咧(le)指台灣話。因為台語是一個音樂性的語言，伊的聲調有「八聲七調」、「九個變調」另外擱有「輕聲調」。台語是「雙聲道」的，伊有「讀書音」佮「白話音」；甚至保留了古早的「入聲字」。尤其是表現了押韻、鬥句的特色，不但有音樂性，嘛有詩歌的形式，所謂「詩樂和諧(hăi)」。比如講：「初三四月眉意，十五六月當圓，廿三四月暗暝。」；「父母疼囝(giàn)長流水，囝想父母樹尾風」；「卜(bhe-)去烏影，毋去吊鼎」等聽起來那像「天籟」仝款。一般人攏認為語言干礁(gān-dā)是一種溝通的工具，其實若針對家己的「母語」來講，語言是有伊足深沈的意義，因為伊是一種「思考」的方式，一種「文化」的傳承，一種「感情」的交流，甚至是一個「族群」的符號。尤其是卜表達親情、愛情、友情等感情的物件，如果若無用家己的父母話，是無法度充分表達出伊的內涵。
有一擺，我佇網路頂，看著一篇描寫「父母」恩情的詩文，尤其是用我的母語─台灣話來表達，我看了真感動，所以最後佇遮(di-zia)，我卜來落實即句「好文章讀出聲，予別人聽」的講法，來介紹即首詩予逐家鼻芳、分享。
父母恩
十月懷胎囝兒生，sin
心頭歡喜抱紅嬰。in
阿母惜惜到三更，gin
毋甘細囝半暝哼。hin
阿爸奔波到暗暝，bhĭn
為著厝內三頓鮮。cin
嬰仔笑聲心頭甜，din
一切辛苦囥一邊。bin
用心計較有所爭，zin
望卜子女出頭天。tin
勞碌走闖生活纏，dĭn
親情感人那詩篇，pin
父母恩情卡大天，ti1
序細友孝卡好錢。zĭn
向望歲壽逐日添，tin
平安快樂食百年。lĭn
即款活跳跳的語語，不但意境深遠擱兼押韻鬥句，讀著真煞拍，所以值得咱逐家作伙來發揚光大，我的演講到遮多謝各位。