細漢若毋鬱，大漢鬱袂屈

陳麗珍/高市大仁國中/11/28/2000

囡仔是上天真、上古錐、上蓋無心機的。īn無彎無kiau，親像一張白紙，等待父母的教養，才會dàng長大成人。

m-gu，即碼有一寡人，因為家境好gorh囡仔生少，著疼命命，寶貝gah卜死。寒天驚伊寒，熱天驚伊熱，抱佇手裡猶gorh驚伊化無去。所以有的囡仔，已經小學五、六年，父母gorh共伊飼飯；伊愛啥mih物件，只要提會diorh，攏卜ga伊辦甲到。囡仔若出門，著親像伺候王爺仝款，觀前顧後，共伊iat風兼拭汗；驚伊過車路危險，甚至共厝搬佮學校仝一bĭng。囡仔若是做毋著代誌，毋甘摃，也毋甘罵，養成伊驕傲、放蕩、是非不明的歹習慣。

zit款囡仔攏是含金湯匙來出世的，規身軀若安金仔粉，別人目珠著bè乎金，m-tāng共動著，若無著是共天公借膽，īn hia-ē歹剃頭的序大人，絕對會予汝一頓粗飽。汝看：敢m是有足濟囡仔，因為愛ciā-bhuah-bìng、無規矩，予老師處罰，īn的父母著到學校大聲細聲嚷喝！

人講：「倖豬夯灶，倖囝不孝」，「倖錢買厝，倖囝賣厝」，zia-ē父母逞倖大漢的囡仔，往往食穿無欠缺，m知天地規斤重，m-bhat人情世事，嘛bhe曉珍惜家己的好命。有的人是卜食m振動的無路用跤數(siau)，gān-dā知影開錢nia-niā，叫伊做代誌全無半撇，「生雞卵的無，放雞屎的有」，「擋無三下斧，著喝艱苦」，īn m知父母早晚攏會離開īn的身軀邊，到hit個時陣，無倚無靠著淒慘落魄囉！

卡嚴重的是「大路m行，行彎嶺；好人m做，做歹囝」，規工四界賴賴趖，濫糝烏白做，舞刀弄槍，相扑、相tăi的佚陶囡仔。īn逐天若痟狗撞墓礦，佮警察走相逐(riōk)，齣頭百百款，予序大人煩惱甲袂食袂睏。但是囡仔已經大漢，隨在汝大聲喝、細聲講伊攏無卜佮汝信篤(dàu)。

「一塊紅紅，顧甲變大人」，做人父母的，那甘心予家己的囡仔變成社會的匪類？「子不教，父之過；教不嚴，師之惰」，所以咱自囡仔細漢著愛好好管教，俗語講：「葉無挽m成叢，囡仔無教m成人」，「細漢若毋鬱，大漢著鬱袂屈」。管教囝仔，「也著箠，也著糜」，囝仔有小可m-diorh，著愛共糾正，bhe-dàng逞倖伊，bhe-dàng替伊掩蓋(kam)；若無，「細漢偷針，大漢偷金」，「細漢偷挽瓠，大漢偷牽牛」，伊會積小過成大錯，做出危害社會的代誌，等甲囡仔出代誌，予人tăi死，抑是予警察掠去關，這著是「細空毋補，大空叫苦」，hit時陣，才後悔以前無好好教示囡仔，著傷慢囉！