(修訂稿)家己栽一欉，kah贏看別人
吳采蓮/國光中學
目前全世界已經是行(giān-)到「知識經濟」的時代，咱若bheh予(ho-)台灣行出去，佇國際上佮人有比並(pīng)，若(na-)無三二步策仔，是無法度的！偏偏咱(lan-)即代的少年人，gā-nā想bheh食好做輕可，穿嫷嫷(sùi)，等領薪水。所以今仔日我bheh演講的zit個題目特別有意義，dorh是「家己栽一欉，卡贏看別人。」
人講一樣米飼百樣人，有的人，bheh食m討趁，愛共(ga)別人伸手來幫助；若卡(kah-)無志氣的，逐工想空想縫想bheh挖別人。有的人卻是腳踏實地，認真做工課，著(dorh-)親像俗語所講：「家己栽一欉，卡贏看別人。」佇社會bheh佮人徛起，事事項項愛靠家己，古早人講的：「倚山山崩，倚壁壁倒，倚豬稠死豬母。」是足有道理的。人人ài自立自強，個個ài提出氣魄來，面對挑戰，免著驚；確定方向，肯食苦，扑拚付出，敢(kàn-)犧牲；bhe
siau貪、bhe摸飛，勤儉擱(gorh)搰力，成功dorh自然來。
「天不生無用之人，地不長無根之草。」真出名的口足畫家─楊恩典小姐，伊出世dorh無手骨，親生父母煞(sùa-)將伊dàn佇岡山火車頭，好佳哉有一位楊牧師共伊成養大漢，但是親像洗嘴、穿衫等，每一項代誌攏愛靠伊一雙腳，伊不但無失志，而且gorh真pà-biàn學習，運用伊一雙腳畫出彩色的人生。
日本嘛有一個乙武洋匡，伊生出來的時，雙腳雙手一點點，醫生將伊抱予īn父母，乙武洋匡的老母看著zit個腳手發育無完全的囝，馬上哭出來！無影了！īn-老母是馬上展出笑容：「ziah-ni古錐的囡仔！」佇邊仔的醫生佮護士，zit時才安心囉。後來伊的父母共(ga)伊當做一般正常囡仔來扶養，佇學校佮正常的小朋友編仝(gang-)班。伊坐輪椅嘛會拍籃球、摃野球佮bè山，「五體不滿足」zit本冊dorh是咧(leh)寫伊自出世到讀大學的經過，內容bhe-bhài，會當加減看。乞丐囡仔賴東進先生，細漢足歹(pàin)命，但是一枝草一點露，伊認真讀冊，無怨無嘆，規尾嘛出頭天呀！。今年才(ziah)過身的殘障作家－劉俠女士，伊不但殘而不廢，擱寫出真濟作品，鼓勵非常濟的人，好腳好手佮破相的，攏受著劉俠女士的感動，īn攏比一般人卡(kah-)扑拚學習，比人卡搰力。īn攏靠家己，bhe去求別人，也bhe向望政府來幫忙。īn嘛是「家己栽一欉，卡贏看別人」的模範。
個人食頭路，企業家做事業，國家拼經濟攏愛抱著「家己栽一欉，卡贏看別人」的信念。最近景氣小可(kua-)回春囉。台灣的電子業、做鎖頭的攏是世界前三名。前一站仔電視攏有報，一間做鞋仔的恆豐公司，伊自己創立一個品牌叫做Miss
Sofi，外銷生理足交易(gā-iah)，佇(di-)美國平均六位女性dorh有一個穿伊的牌子的鞋仔。二十幾年來定定有人勸īn頭家愛將股票上市，伊攏無興趣；顛倒將利純發予員工做年底獎金，鼓勵員工認真做鞋仔。īn頭家認為臺灣bhe-sai-只靠加工來趁錢，也bhe-sai-只靠粗俗的產品來佮大陸競爭，一定愛研發新技術，提高品質。zit-幾年來，伊做gah真成功！已經將家己公司自創的品牌sak-kì國際舞台，m-niā揚眉吐氣，擱會當趁外匯，真正是一舉數得。
人講一欉菜是一百個人拜，若bheh(卜)有好收成，dorh愛付出真大的代價，流真濟的汗；無可能蹺跤撚喙鬚，成功著ùi(對)天頂跋落來。所以做人嘛攏愛守本份、認真做，頭殼愛知變竅，有時嘛愛看風駛船，m通死ding-dīng，千萬m通定定想bheh靠別人，這著親像「火燒罟寮」─全無望啦！所以人人愛記得「家己栽一欉，卡贏看別人。」的道理，毋(m)驚艱苦，因為靠人人老，靠山山倒，靠家己上蓋(gài-)好。
小港國中閩南語授課教師培訓班 學員 吳采蓮 敬上 93
05 27
【原稿】家己栽一欉，卡贏看別人
國光中學 的吳采蓮
目前全世界已經是走到「知識經濟」的時代，阮那袂使台灣走出去，佇國際上跟人來比拼，那無三二步策仔，是無法度的！偏偏阮即代的少年人，干那想袂食好做輕可，穿嫷嫷，等領薪水。所以我今日袂演講的這個題目特別有意義，就是「家己栽一欉，卡贏看別人。」
人講一樣米飼百樣人，有的人，要吃不討賺，愛靠別人伸手來幫助；啊哪夠卡沒志氣的，天天想孔想縫想欲袂挖別人。有的人了卻是腳踏實地，認真做工作，都親像俗語說的：「家己栽一欉，卡贏看別人。」在社會上欲家人徛起，事事項項愛靠家己，古早人說的：「倚山山崩，倚壁壁倒，倚豬稠死豬母。」是多麼有道理。人人愛自立自強，個個愛拿出氣魄來，面對挑戰，免著驚；確定方向，肯食苦，扑拼付出，甘（肯）犧牲；賣宵貪、賣摸灰，勤儉又骨力，成功是自然來。
天不生無用之人，地不長無根之草。金出名的口足畫家 － 楊恩典小姐，她生世都沒手骨。囡仔時親生父母就將伊丟在岡山火車站，是有一位楊牧師家伊養大漢，伊刷牙、穿衫啥e，每一項事情攏愛靠伊那一雙腳，伊不但毋失志，她卻是甲巴結，運用伊這雙腳畫出伊彩色的人生。
日本嘛有一個乙武洋匡，他生出來的時候，雙腳雙手一點點，醫生將伊抱給他的父母，乙武洋匡伊媽媽看著這個腳手發育不完全的囝仔，馬上哭出來！無影了！伊媽媽是馬上展出笑容說：「這麼古錐的囝仔！」佇旁邊的醫生甲護士，這時陣才安心囉。後來伊的父母甲伊當做一般正常囝仔來扶養，在學校跟正常的小朋友編在同一班。伊坐輪椅嘛e打籃球、摃野球甲爬山，五體不滿足這本冊就是在寫伊自出生到讀大學的經過。內容不錯，可以加減看。乞丐囝仔賴東進先生，細漢甲歹命，但是一枝草一點露，伊認真讀冊，無怨無嘆，歸尾嘛出頭天呀！。今年甲過身的殘障作家－劉俠女士，她不但殘而不廢，又寫出真多作品，鼓勵非常多的人，有好腳好手的，有破相的，受到劉俠女士的感動，他們攏比一般人卡扑拼學習，比人卡骨力。他們攏靠家己，袂去求別人，也毋奢望政府來幫忙。他們嘛是「家己栽一欉，卡贏看別人」的好模範（好漢）。
個人做頭路，企業家做事業，國家拼經濟攏愛抱著「家己栽一欉，卡贏看別人」的信念。最近景氣稍微有回春囉。台灣的電子業、做鎖頭的攏是世界前三名。前幾一陣子電視攏有報，一間做鞋仔的恆豐公司，伊自己創立一個品牌叫做Miss Sofi，外銷非常嗆仔，在美國平均每六位女性都有一個穿伊的牌子的鞋。二十幾年來常常有人勸伊頭家愛將股票上市，伊攏毋興趣；反過來每年發豐厚的年終獎金，鼓勵員工認真做鞋仔。伊頭家認為臺灣不能光靠加工來賺錢，也不能只靠便宜的產品來跟大陸競爭，一定愛研發新技術，提高品質。這幾年來伊做得真成功！已經將伊家己公司自創的品牌推上國際舞台，不但揚眉吐氣，卡e當賺外匯，真正是一舉數得。
人說一欉菜是一百個人拜，那卜有好收成，都愛付出真大的代價，流真多的汗；無可能蹺跤撚喙鬚，成功著對天頂跋落來。所以做人嘛攏愛認真拼，認分做，頭殼愛e變俏，有時嘛愛看風駛船，不湯死丁丁，千萬不湯定定想袂欲靠別人，這攏親像乞食在望做功德，無希望啦！所以人人愛記得「家己栽一欉，卡贏看別人。」的道理，毋驚艱苦，因為靠人人老，靠山山會倒，靠家己尚界好。
小港國中閩南語授課教師培訓班 學員 吳采蓮 敬上 93 05 27