(修正稿)我上合意的一句俗語陳麗菊/正興國中

陳麗菊/正興國中

俗語講：「有志氣著(dorh-)有機會；散赤人出好子弟」，佇(di-)社會上人人攏希望過著幸福快樂的日子，毋過(m-gor)，卻無一定會達成zit個願望，差別著佇一個(ē)人的所作所為。

為啥物講「有志氣著有機會；散赤人出好子弟」？一般人的欠點著是「人在福中不知福」。自細漢父母無所不至的照顧，成做囡仔無法度獨立，m知影愛靠家己扑拚(pà-biaⁿ)的個性，尤其是zit-mà的社會真濟zit種情形。就我所知影的，有足濟大學教授的囡仔，雖然讀gah大學抑(iā)是碩士，畢業了後dùa佇厝，逐工bhih佇房間聽音樂，變(bìⁿ-)東變西，著是無bheh認真去cue頭路。顛倒是散赤人的囡仔，為了改善厝裡參家己的經濟環境，會當靠家己的雙手認真扑拚。咱上愛講予(ho-)囡仔聽的，dorh是王永慶奮鬥的故事，其實gorh有真濟有成就、出名的人是參王永慶gang款。

俗語講得好：「做雞著筅(cìng)，做人著反(bìng)」。咱人若想bheh佇社會上佮人徛(kia)起、佮人會比pīng，著(diorh)愛認真，只要有志氣，把握機會，總會達成願望。千萬著m通像gik骨仔話所講的「十個銀角仔dan落土腳－一箍(ko)散散」，做事擱(gorh-)親像「大樓的電梯」－起起落落，無定性，按爾(an-ni)想bheh共(ga-)代誌做乎(hō)好，是有卡(kah-)困難。

「匏仔出世成葫蘆；幼柴浸水發香菇」、「歹(paiⁿ-)竹出好筍」，現在是一個自由競爭的社會，咱會當看著bhe少出身散赤的人，靠著伊的志氣，認真讀冊、認真扑(pà-)拚，成就家己的前途。

看別人想家己，阮厝裡的環境因為兄弟姊妹濟，阿爸、阿母的負擔真重。細漢的時，阿母著定定共我講：「有志氣著有機會」，叫我愛認真讀冊，以後cue卡好的頭路，生活著會卡(kah-)好過，汝的後生查某囝卡bhue綴(dùe-)恁食苦。zit-mà佇學校內底，若是看著環境無好，但是會當認真學習的學生，心肝裡感覺真歡喜，替伊的父母感覺真安慰，相信īn的未來一定bhue-bhài。

所以「有志氣著有機會；散赤人出好子弟」，是我上合意的一句俗語。過去我鼓勵我家己，zit-mà我用來鼓勵我的學生，鼓勵īn佇歹環境，iū-原愛開創一條平坦(tàⁿ)的大路。

(原稿)我上合意的一句俗語

陳麗菊/正興國中

人講：「有志氣著有機會；散赤人出好子弟」佇社會上人人攏希望過著幸福快樂的日子，毋過，卻無一定會達成即個願望，差別著佇ē人的所作所為。

為啥物講「有志氣著有機會；散赤人出好子弟」？一般等的人有一種毛病，就是「人在福中不知福」。自細漢父母無所不致的照顧，成做囡仔無法度獨立，毋知影愛靠家己打拼的個性，尤其是即碼的社會真濟即種情形。就我所知影的，有足濟大學教授的囡仔，雖然讀到大學亦是碩士，畢業了後蹛佇茨，逐工匿佇房間聽音樂，bīn 東bīn 西，著是無欲認真去揣頭路。顛倒是散赤人的囡仔，為了改善茨裡參家己的經濟環境，會當靠家己的雙手認真打拚。咱上愛講與囡仔聽的，就是王永慶打拚的故事， 其實擱有真濟出名的人是參王永慶同款。

俗語講得好：「做雞著筅，做人著bìng」。咱人若想欲佇社會上佮人站起、佮人會比pīng，著愛認真，只要有志氣，把握機會，總會達成願望。千萬著毋通像人講的「十角」－一箍散散，做事擱親像「大樓的電梯」－起起落落，無定性，安爾想欲共事誌做好，是有卡困難。

「匏仔出世成葫蘆；幼柴浸水發香菇」、「歹竹出好筍」，現在是一個自由競爭的社會，咱會當看著袂少出身散赤的人是，靠著伊的志氣，認真讀冊、認真打拚，成就家己的前途。

看別人想家己，阮茨裡的環境因為兄弟姊妹濟，阿爸阿母的負擔真重。細漢的時，阿母著定定共我講：「有志氣著有機會」，叫我愛認真讀冊，以後揣卡好的頭路，生活著會卡好過，你的後生查某囝卡bhue綴恁食苦。即馬佇學校內底，若是看著環境無好，卻會當認真學習的學生，心肝裡感覺真歡喜，替伊的父母感覺真安慰，相信伊的未來一定bhue嫼。

「有志氣著有機會；散赤人出好子弟」，是我上合意的一句俗語。