(修訂稿) 毋願做母語的啞口

江佩芳/五福國中

毋願做母語的啞口，因為有人講「母語若失聲，著cue-(揣)無阿娘」。母語是啥？著是阿娘自細漢共咱成(ciāⁿ-)養大漢的過程中，īn-(怹)用心對阮講的話，內裡有的是īn表達對咱的愛、有的是教咱做代誌的方法、嘛有教示咱做人的道理。如果咱聽無，著無法度了解īn對咱的關懷；咱若bhe-(袂)曉講，嘛bhe當表達咱對īn的回應。更加重要的是阮著無法度共(ga-)祖先傳落來的智慧吸收，而且一代一代傳承落去。

毋願做母語的啞口(gàu)，因為母語會使講是本土文化的活化石，也是咱保留文化上好勢的光碟─記載阮祖先流落來的風土民情gah-(佮)生活的縮影，親像褒歌、俗諺語、食茶講好話，內底咱會使了解序大īn生活的過程、欣賞īn生活的智慧；毋願做母語的啞口，因為母語會當講是國家寶貴的文化資產，促進社會的多元化，佇咱(lan-)台灣zit塊寶島頂峘，有足濟族群，只有透過不斷的接觸（ziap-ciok）、互相的了解，才有法度形成zit-(即)款包容的海洋精神；毋願做母語的啞口，因為母語嘛是維護阮族群尊嚴佮信心的工具，親像以前原住民攏m敢承認家己著是原住民，因為認同家己的族群是見笑的，嘛無想bheh講家己的母語，致使原住民語漸漸消失，sua-(紲)落去連一寡優秀的文化、傳統風俗嘛漸漸消失了了，阮千萬毋通像zit-mà(即碼)足濟少年仔攏bhe-(袂)曉講母語，gah(佮)阿公、阿媽講話的時陣sùa-(煞)bhe通，m-niā(毋單)感情扑歹，連文化嘛烏有去。所以保留母語，特別對咱強bheh-(卜)消失的傳統文化的保留有足大的幫贊(zān)。既然母語有ziah-ni重要性，當然，咱毋願做母語的啞口。而且咱愛慣勢(sì-)用母語來講話，親情之間的感情才會當交流、文化才有法度釘根生tuaⁿ(湠)。若無，以後dorh聽bhe著母語，時間一久，恐驚想卜講嘛無法度擱講啊，按爾著真正變成母語的啞口矣！

早期台灣的子弟，會曉講家己的母語─台語，但是佇學校bhe-sai講；zit-mà本土文化受重視，咱的子弟e-sai佇學校講母語，但是已經bhe-hiau講。咱攏知：若卜落田作穡，當然愛有適當的工具，才會當有好的收成。zit-mà咱有一塊母語的田園，本來是足有肥底，毋過，zit規冬因為欠人照顧，遂來拋荒去，實在足無cài(采)。所以咱愛用行動來開墾、用心來種作，用喙來講，用筆來寫，共同來了解母語的sùi(嫷)、開發伊的資源、ho-(予)伊一個美麗的將來。

(原稿) 毋願做母語的啞口

江佩芳/五福國中

毋願做母語的啞口，因為有人講「母語若失聲，著揣無阿娘」。母語是啥？著是阿娘自細漢共阮晟養大漢的過程中怹用心對阮講的話，內裡有的是怹表達對阮的愛、有的是教阮做代誌的方法、嘛有教示阮做人的道理。如果阮聽無，著無法度了解怹對阮的關懷；阮若袂曉講，嘛袂當表達阮對怹的回應。更加重要的是阮著無法度共遮祖先傳落來的智慧吸收，共伊一代一代流傳落去。

毋願做母語的啞口，因為母語會使講是本土文化的活化石，也是阮保留文化上好勢的光碟─記載阮祖先流落來的風土民情佮生活的縮影，親像褒歌、俗諺語、食茶講好話，內底阮會使了解序大怹生活的過程、欣賞怹生活的智慧；毋願做母語的啞口，因為母語會當講是國家寶貴的資產，促進社會的多元化─佇阮台灣遮塊寶島頂峘，有足濟族群，只有透過不斷的接觸（ziap-ciok）、互相的了解，才孕育出阮遮款包容的海洋精神；毋願做母語的啞口，因為母語嘛是維護阮族群尊嚴佮信心的工具，親像以前原住民攏無敢承認家己著是原住民，因為感覺家己的族群是見笑的，嘛毋愛講家己的母語，遂使得原住民語漸漸消失，續落去連一寡優秀的文化、傳統風俗嘛漸漸消失了了，阮千萬毋通像即馬足濟少年仔攏毋曉講母語，共阿公阿嬤講話的時陣遂毋通，毋單感情扑歹矣，連文化嘛烏有去。所以保留母語，尤其對阮強卜消失的傳統文化的保留有足大的幫贊。既然母語有誠濟重要性，當然，阮毋願做母語的啞口。而且阮愛定定用母語來講話，親情之間的感情才會當交流、文化才會流傳落來。若無安爾，以後就聽袂著母語，時間一久，恐驚想卜講嘛沒法度擱講啊，安爾著真正變成母語的啞口矣！

阮攏知：若卜下田作穡，當然愛有適當的工具，才會當有好的收成。即馬阮一塊母語的田園，本來是足有肥底，毋過，幾規冬因為欠人照顧，遂來拋荒去，實在足沒采。所以阮愛用行動來開墾、用心來耕耘，用喙來講，用筆來寫，共同來了解母語的嫷、開發伊的資源、乎伊一個美麗的未來。