母語的奶芳─囡仔歌

「囡仔歌」佇族群文化的意義上來講，伊是老大人回想做囡仔時代無煩無惱一段有笑聲的記憶。對即碼的少年來講，在歷史佮文化認知上，嘛有傳承的作用，簡單講伊是一個族群共同的聲嗽。童謠的內容是古錐樸素，活潑心適，所以長輩佮序細 (晚輩)佇即款的趣味、優雅的童謠中，常常會當建立了和諧、溫暖的親情。進一步講，遮個(這些)童謠囡仔歌，內容就大自然佮土地上來取材的，會使(可以)講天真浪漫、幻想豐富、心適趣味、押韻鬥句、韻律煞拍。佇伊成長的過程中，透過兒童純真的感情，唸唱著囡仔歌，佇無形中學著母語的腔口，呼吸著母語的音樂節奏，體會著感情的流露，塑造了伊的鄉土性格佮對未來的寄望。即款的感情，經由囡仔兄的唱聲佮笑聲，保存佇怹(他們)逐家心肝底、頭殼內，日後化作族群的心聲、台語文學的肥底。

母語是唯嬰仔出世的時開始學起的，是佇生活中練習的，不是去學校才請老師教的。因為唯(由)生活中學的母語，講的話卡有感情、才會煞拍，嘛才有法度保留家己族群的腔口佮文化。所以今仔日，除了咱甘願卜將家己的母語放速(放棄)，若無咱愛佇厝裡參序細講台語，毋(m7)通佫互阿公、阿媽用足食力的北京語參孫仔開講。尤其細漢囡仔，佇伊一暝大一寸的成長期間，教伊台灣的「囡仔歌」，會當予伊表現天真浪漫的感情，接觸鄉土的色彩、感受生活的鹹酸甜，予伊一面吮著阿娘的奶芳，一面聽著土地的聲嗽，過著一個快樂的童年，做一個正港的台灣人。