卜食魚臊 (花鼓調)
卜食魚臊近海墘， beh chiah8 hi5 chho kin7 hai2 kiN5
卜交娘仔著厝邊， beh kau nio5 a2 tioh8 chhu3 piN
出出入入通參見， chhut chhut jip8 jip8 thang saN kiN3
恰好陰間燒庫錢。 khah4 ho2 im kan sio khoo3 chiN5
千里路途 (台東調)
千里路途無嫌遠， chhian li2 loo7 too5 bo5 hiam5 hng7
見面親像蜜攪糖， kiN3 bin7 chhin chhioN7 bit8 kiau2 thng5
苦唔時鐘行倒轉， khoo2 m7 si5 ching kiaN5 to3 tng2
好話未講天先光。 ho2 ue7 bue7 kong2 thiN sing kng
土豆卜食 (雙雁影調)
土豆卜食粒粒芳， thoo5 tau7 beh chiah8 liap8 liap8 phang
迎新棄舊唔是人， geng5 sin khi ku7 m7 si7 lang5
向望兄哥相疼痛， ng3 bang7 hiaN ko sio thiaN3 thang3
疼痛阮身珠娘人。 thiaN3 thang3 gun2 sin chu nio5 lang5
小妹佮哥 (台東人調)
小妹佮哥跡爾好， sio2 muai7 kah ko chiah ni7 ho2
望卜生囝親像哥， bang7 beh seN kiaN2 chhin chhioN7 ko
檢采哥仔若轉倒， kiam2 chhai2 ko a2 na7 tng2 to3
有時看囝那看哥。 u7 si5 khoaN3 kiaN2 na2 khoaN3 ko
天頂落雨 (台東調)
天頂落雨流目屎， thiN ting2 loh8 hoo7 lau5 bak8 sai2
心腸苦切無人知， sim tng5 khoo2 chheh bo5 lang5 chai
想卜大山移落海， sioN7 beh tua7 soaN i5 loh8 hai2
將伊的厝移過來。 chiong i e5 chhu3 i5 koe3 lai5
心肝煩惱 (五更鼓調)
心肝煩惱頭低低， sim koaN hoan5 lo2 thau5 ke7 ke7
神魂四散滿天飛， sin5 hun5 si3 san3 moa2 thiN poe
一時無看嫂遮過， chit8 si5 bo5 khoaN3 so2 chia koe3
兄哥煩惱袂讀冊。 hiaN ko hoan lo2 be7 thak8 chheh
水錦開花(一) (六月茉莉調)
水錦開花白蔥蔥， chui gim2 khui hoe peh8 chhang chhang
哥仔生水真害人， ko a2 seN sui2 chin hai7 lang5
一年梟千佮梟萬， chit8 ni5 hiau chheng kah hiau ban7
採了花心過別叢。 chhai2 liau2 hoe sim koe3 pat8 chang5
水錦開花(二) (六月茉莉調)
水錦開花白猜猜， chui gim2 khui hoe peh8 chhai chhai
樹莓開花無人知， chhiu7 m5 khui hoe bo5 lang5 chai
娘仔未大想卜歹， nio5 a2 boe5 toa7 sioN7 beh phaiN2
起風落雨汝就知。 khi2 hong loh8 hoo7 li2 chiu7 chai
水錦開花(三) (六月茉莉調)
水錦開花白猜猜， chui gim2 khui hoe peh8 chhai chhai
風吹菅尾倒規排， hong chhoe koaN boe2 to2 kui pai5
咱嫂佮哥真意愛， lan2 so2 kah ko chin i3 ai3
阮厝父母全唔知。 gun2 chhu3 pe7 bu2 choan5 m7 chai
水錦開花(四) (雙雁影調)
水錦開花白波波， chui gim2 khui hoe peh8 pho pho
八仙過海藍采和， pat sian koe3 hai2 na5 chhai2 ho5
真名正姓共哥報， chin mia5 chiaN3 seN3 ka7 ko po3
免得互哥去揣無。 bian2 tit hoo7 ko khi3 chhoe7 bo5
玉蘭開花 (搭車調)
玉蘭開花芳透天， giok8 lan5 khui hoe phang thau3 thiN
挽入房間芳規暝， ban2 jip8 pang5 king phang kui mi5
將花提入蠓罩內， chiong hoe theh8 jip8 bang2 ta3 lai7
半暝芳到枕頭邊。 poaN3 mi5 phang kau3 chim2 thau5 piN
含笑過晝 (浪子走天涯調)
含笑過晝芳芎蕉， ham5 siau3 koe3 tau3 phang kin chio
手倌菜籃挽茶葉， chhiu2 koaN7 chhai3 na5 ban2 te5 hioh8
驚父驚母唔敢叫， kiaN pe7 kiaN bo2 m7 kaN2 kio3
假意呼雞喝獵鶚。 ke2 i3 khoo ke hoah4 lai7 hioh8
牡丹開花 (五更鼓調)
牡丹開花笑微微， boo2 tan khui hoe chhio3 bi5 bi5
娘仔生水真標緻， nio5 a2 seN sui2 chin phiau ti3
害我冥日病相思， hai3 goa2 me5 jit8 peN7 siooN si
想卜佮娘結連理。 sioN7 beh kah nio5 kiat lian5 li2
阮厝站佇 (搭車調)
阮厝坫佇娘厝後， gun2 chhu3 tiam3 ti7 nio5 chhu3 au7
不時看娘咧探頭，put si5 khoaN3 nio5 le0 tham3 thau5
情意總有九分九， ching5 i3 chong2 u7 kau2 hun kau2
路邊相撞頭勾勾。 loo7 piN sio tng7 thau5 kau kau
兩人意愛 (南光調)
兩人意愛在心內， lng lang5 i3 ai3 chai7 sim lai7
咱哥在東妹在西， lan2 ko chai7 tang moe7 chai7 sai
兄娘若無嫌我歹， hiaN nio5 na7 bo5 hiam5 goa2 phaiN2
做蠅做蠓都飛來。 cho3 sin5 cho3 bang2 to poe lai0
門口一叢 (浪子走天涯調)
門口一叢相思叢， bng5 khau2 chit8 chang5 sioN si chang5
相思病落唔知人， sioN si peN7 loh0 m7 chai lang5
先生來看講無望， sian seN lai5 khoaN3 kong2 bo5 bang7
搭心來看好咚咚。 tah4 sim lai5 khoaN3 ho2 tang tang
阿君卜轉 (浪子走天涯調)
阿君卜轉阮卜留， a kun beh4 tng2 gun2 beh4 lau5
留君神魂用紙包， lau5 kun sin5 hun5 iong7 choa2 pau
等君去後提來敨， tan2 kun khi3 au7 theh8 lai5 thau2
日日看君佇阮兜。 jit8 jit8 khoaN3 kun ti7 gun2 tau
為娘掛吊(一) (南光調)
為娘掛吊烏礁瘦， ui7 nio5 koa3 tiau3 oo ta san2
褲帶燒灰做爐丹， khoo3 toa3 sio hu cho3 loo5 tan
褲帶燒灰食會好， khoo3 toa3 sio hu chiah8 e7 ho2
先生趁水食都無。 sian seN than3 chui2 chiah8 to bo5
為娘掛吊(三) (南光調)
為娘掛吊心肝亂， ui7 nio5 koa3 tiau3 sim koaN loan7
跡久穡路無來觀， chiah ku2 sit loo7 bo5 lai5 koan
先生來看百樣款， sian seN lai5 khoaN3 pah iong7 khoan2
無見親娘唔照原。 bo5 kiN3 chhin nio5 m5 chiau3 goan5
神魂互娘(一) (人道調)
神魂互娘迷落甕， sin5 hun5 hoo7 nio5 be5 loh8 ang3
點火甕內揣無空， tiam2 hoe2 ang3 lai7 chhoe7 bo5 khang
啥人好心共我放， siaN2 lang5 ho2 sim ka7 goa2 pang3
佮伊相好一世人。 kah i siong ho2 chit8 si3 lang5
神魂互娘(二) (人道調)
神魂互娘迷落櫃， sin5 hun5 hoo7 nio5 be5 loh8 kui7
坫佇櫃底開袂開， tiam3 ti7 kui7 te2 khui be7 khui
著愛共娘講好喙， tioh8 ai3 ka7 nio5 kong2 ho2 chhui3
叫伊鎖匙舉來開。 kio3 i so2 si5 giah8 lai5 khui
茶甌摃破 (夜夜為你來失眠調)
茶甌摃破唔成瓷， te5 au kong phoa3 m7 chiaN5 hui5
少年無妻上克虧， siau3 lian5 bo5 chhe siong7 khek khui
兄哥坐落喘大氣， hiaN ko che7 loh8 chhoan2 toa7 khui3
好魚好肉食袂肥。 ho2 hi5 ho2 bah chiah8 be7 pui5
梅仔好食 (夜夜為你來失眠調)
梅仔好食酸勿勿， moai5 a2 ho2 chiah8 sng but8 but8
楊桃好食交懍恂， ioN5 to5 ho2 chaih8 ka lun2 sun2
若無佮哥共床困， na7 bo5 kah ko kang7 chhng5 khun3
因何褲帶短三寸。 in ho5 khoo3 toa3 te2 saN chhun3
路邊出有 (花鼓調)
路邊出有相思草， loo7 piN chhut u7 sioN si7 chhau2
阿君卜用則來媷， a kun beh ing chiah lai5 khau
媷去泡茶淋落喉， khau khi3 phau3 te5 lim loh8 au5
若好隨時來娘兜。 na7 ho2 sui5 si5 lai5 nio5 tau
鼓井有水 (台東人調)
鼓井有水清又深， koo2 cheN2 u7 chui2 chhing iu7 chhim
落落紅柑半浮沈， lak loh8 ang5 kam puaN3 phu5 tim5
若是卜沈沈落去， na7 si7 beh tim5 tim5 loh0 khi0
勿佫浮起動人心。 mai3 koh pku5 khi2 tang7 lang5 sim
蓮藕拍斷 (運河殉情曲調)
蓮藕拍斷會牽絲， lian5 ngau7 phau4 tng e7 khan si
菜瓜辿藤密密纏， chhai3 koe soan tin5 bat8 bat8 tiN5
中意入心難分離， teng3 i3 jip8 sim lan5 hun li5
相好唔是一半年。 siong ho2 m7 si7 chit8 poaN3 ni5
燈火無油 (五更鼓調)
燈火無油捷捷趒， ting hoe2 bo5 iu5 chiap8 chiap8 tio5
跤尾無人困袂燒， kha boe bo5 lang5 khun3 be7 sio
來到娘兜互娘笑， lai5 kau3 nio5 tau hoo7 nio5 chhio3
無錢用計想甲著！ bo5 chiN5 iong7 ke3 sioN7 kah tioh8
頭殼若眩 (運河殉情曲調)
頭殼若眩搏搏彈， thau5 khak na7 hin5 phok8 phok8 toaN7
腹肚若疼迵心肝， pak too2 na7 thiaN3 thang3 sim koaN
若無搭心通來看， na7 bo5 tah sim thang lai5 khoaN3
醫生免叫藥免煎。 i seng bian2 kio3 ioh8 bian2 choaN
講著汝慘 (運河殉情曲調)
講著汝慘我也慘， kong2 tioh8 li2 chham2 goa2 ia7 chham2
雙人相招來跳潭， siang lang5 sio chio lai5 thiau3 tham5
妹來跳深哥跳淺， muai7 lai5 thiau3 chhim ko thiau3 chhian2
卜留親哥傳香煙。 beh lau5 chhin ko thoan5 hioN ian |
