千 家 詩 - 千家詩導讀欣賞

序文            五言絕句     五言律詩     七言絕句(上)     七言絕句(下)     七言律詩     千家詩導讀欣賞

002

訪袁拾遺不遇 孟浩然  hong² uan⁵-sip⁸-ui⁵ put⁵ gu⁷

洛陽訪才子，                   lok⁸ iong⁵ hoo² cai⁵ cu²

江嶺作流人。                   kang¹ ling² cok⁴ liu⁵ jin⁵

聞說梅花早，                    bun⁵ suat⁴ buenn⁵ hua¹ co²

何如此地春。                    ho⁵ ju⁵ chu² te⁷ chin¹

 

〔欣賞〕

    人到了洛陽的時，想卜專程去拜訪袁才子，探聽了後才知影(也)，伊已經予朝廷降官發配到江西庾嶺去了。聽講迄個所在的梅花開甲足早，雖講江南景色真嫷(sui²)，但是敢比會得過家己家園的春色。

    這是一首拜訪好朋友無拄著人，結果煞聽講朋友不幸遭受流放的命運，作者孟浩然所發出來的感慨。詩人原本抱著興奮的心情，逶遙遠的所在來到洛陽，想卜拜訪即位姓袁的才子朋友，不但無遇著，煞聽著，伊被流放到江西庾嶺去，真是世事難料。比較卡安慰的是，迄爿的氣候溫和，梅花開了誠早，光景真迷人，但是「江南雖好是他鄉」，所以根本著無心情去欣賞。

    即款一問一答，正是詩人對朋友的關心，處處為朋友設想，歸首詩無深奧的文字，但所表現出來的感情，卻是非常的深沈佮悲痛。

---

046

送友人                       李白  song³ iu² jim⁵  Li²-pik⁸

青山橫北郭，                   ching¹ san¹ hing⁵ pok⁴ kok⁴

白水繞東城，                   pik⁸ sui² jiau² tong¹ sing⁵

此地一為別，                   cu² te⁷ it⁴ ui⁵ piat⁸

孤蓬萬里征。                   koo¹ phong⁵ ban⁷ li² cing¹

浮雲遊子意，                   hu⁵ un⁵ iu⁵ cu² i³

落日故人情，                   lok⁸ jit¹⁸ koo³ lim⁵ cing⁵

揮手自茲去，                   hui¹ siu² cu⁷ cu¹ khu³

蕭蕭斑馬鳴。                   siau¹ siau¹ pan¹ ma² bing⁵

〔欣賞〕

    青山的山嶺橫佇北爿的外城，白色的溪水向城東流--去。佇即個所在道別了爿後，汝著親像無根的蓬草(phong⁵-cho²)一般，飄向萬里以外去了。舉頭看著天頂悠悠移動的白雲，正是汝心情的描寫，日頭卜落山，著可比我對汝依依不捨的心情。咱作伙曳(iat⁸)手從此離別，雖然汝的身影漸行漸遠，猶原清楚聽著馬仔告別的聲音。

    即首詩是作者佇青山白水之間，送別友人的詩作。「孤蓬」是象徵飄泊的孤單。「浮雲」來去無蹤的特性，來象徵遊子未來的命運前程。「落日」來說明兩人友情的美好卻是短站，所謂「夕陽無限好，只是近黃昏」的無奈。歸首詩看起來，攏是「即景喻情」，由足濟真嫷的畫面所形塑而成的，比如：「青山北郭」、「白水東城」、「浮雲落日」等來表達離別的悲哀，佇即款的情景下，莫怪兩人一時攏無話無句，所謂「無聲勝有聲」了。煞尾用馬仔淒涼的叫聲，來代表兩人悲傷無奈的心情。

　

---

063

旅夜書懷                   杜甫  lu² a⁷ su¹ huai⁵  Too⁷-hu²

細草微風岸，                   se³ cho² bi⁵ hong¹ gan⁷

危檣獨夜舟，                   gui⁵ chiong⁵ tok⁸ ia⁷ ciu¹

星隨平野闊，                   sing¹ sui⁵ ping⁵ ia² khuat⁴

月湧大江流。                   guat⁸ iong² tai⁷ kang¹ liu⁵

名豈文章著，                   bing⁵ khi² bun⁵ ciong¹ tu³

官因老病休，                   kuan¹ in¹ loonn² ping⁷ hiu¹

飄飄何所似，                   phiau¹ phiau¹ ho⁵ soo² su⁷

天地一沙鷗。                   thian¹ te⁷ it⁴ sa¹ iu¹

〔欣賞〕

    微風吹著江岸邊的草仔，暗時仔，栽(chai⁷)帆柱的船仔獨自歇佇江邊。曠闊的野外，星光咧閃晰(sih⁴)，月光照佇大江波濤(pho¹-to⁵)洶湧(hiong¹-iong²)的水面。我的詩作，雖講有淡薄的成就，但是已經有年歲矣，身體嘛厚病痛，所以愛告老回鄉。我飄泊一生親像啥乜(mih⁸)款？著像佇海面、陸地世界(si³-ke³)咧消遙飛行的卡膜脈(海鷗)。

    即首詩是唐代宗永泰元年，杜甫因華州司功解職離開四川成都，坐船到重慶的時，有感而發所作。咱攏知影，杜少陵一生中有伊得意成就的一面，嘛有伊失志落魄(phik⁴)的一面。所謂「得意」，是指伊的詩才，伊也以此感覺自豪驕傲，所以伊捌講：「詩是吾家事」，口氣雖然有卡大，但是「詩聖」的地位，是有資格講即款的話。另外「失意」，著是指伊「官途無順」，詩人是抱著「滿腹的壯志」，想卜有一番作為，但是懷才不遇。「旅夜書懷」即首詩，著是由「得意」、「失意」兩方面衝突所產生的結晶。

---

085

春日偶成                     程顥  chun¹ jit⁸ gonn² sing⁵  thiann⁵-ho⁷

雲淡風輕近午天，        un⁵ tam⁵ hong¹ khing¹ kun⁷ gonn² thian¹

傍花隨柳過前川。         pong⁷ hua¹ sui⁵ liu² ko³ cian⁵ chuan¹

時人不識余心樂，        si⁵ jin⁵ put⁴ sik⁴ u⁵ sim¹ lok⁸

將謂偷閒學少年。         ciong¹ ui⁷ thoo¹ han⁵ hak⁸ siau³ lian⁵

 

〔欣賞〕

    佇春夏交替的季節，有一工將近中晝的時，天頂的雲真明朗，微風輕輕真清爽，我倚(ua²)近花園賞花，靠近柳樹納涼，一路歡歡喜喜踅(seh⁸)過頭前的溪水。作伙行的人，甚至路上的行人，攏毋(m⁷)知影我歡喜是為啥代？只好講：我是偷偷仔咧揣時間，學少年人自在、放蕩的作風。

    俗語講：「一花一世界，一葉一如來」，大自然處處提供足好的生活素材，只要好好體會大自然的奧妙─「生生之德」，任何一花一草，一動一靜，隨時會凍佇心中創造另外一個天地，這是萬物存在自然中的一點生機趣味而已。了解萬物各有其「生趣」的存在 ，安爾(呢)每一個人內心所感受的世界，一定會閣卡和諧。程顥佇即首中，完全將「本人」佮「物」同在的心境表露出來，意境清新，予讀者感染著「年輕」的活力。

---

086

春日                          朱熹  chun¹ jit⁸  cu¹-hi¹

勝日尋芳泗水濱，         sing³ jit⁸ sim⁵ hong¹ su³ su² pin¹

無邊光景一時新。         bu⁵ pian¹ kong¹ king² it⁴ si⁵ sin¹

等閒識得東風面，         ting² han⁵ sik⁴ tik⁴ tong¹ hong¹ bian⁷

萬紫千紅總是春。         ban¹ ci² chian¹ hong⁵ cong² si⁷ chun¹

 

〔欣賞〕

    佇一個天氣晴朗的日子，到野外賞花踏青，來到泗水的岸邊，即個所在一望無際的景色，突然現出新的氣象。一般人攏知影，春風撩人，吹著面上是啥乜款的感覺。迄種百花盛開，萬紫千紅，會使講全是春光點染(ni2)而成的。

    被稱呼做「朱文公」、「朱子」的朱熹，雖是一個宋朝有名的理學家，道德學問超人，但是佇詩中往往嘛有伊感性的一面。即首詩著是佇平淡心境中表現出豪爽的氣象。

    此詩完全是白描的「賦體」，一點都無雕刻的痕跡(hun5-jiah4)，造語平淡，而寄意深遠。第一句是敘事，第二句為寫景，第三、四兩句以議論表現，用「識得」字眼，將個人的經驗共伊普遍化，末句更用「總是」之虛字，將景致佮人事融化為一體，充滿了天人合一、樂觀積極的精神。「萬紫千紅總是春」，固是整首詩的警句，也是朱文公千古的絕唱。

---

087

春宵                          蘇軾  chun¹ siau¹  soo¹-sik⁴

春宵一刻值千金，         chun¹ siau¹ it⁴ khik⁴ tit⁸ chiam¹ kim¹

花有清香月有陰。         hua¹ iu² cing¹ hiong¹ guat⁸ iu² im¹

歌管樓臺聲細細，         ko¹ kuan² loo⁵ tai⁵ sing¹ se³ se³

鞦韆院落夜沈沈。         chiu¹ chian¹ uan⁷ lok⁸ ia⁷ tim⁵ tim⁵

 

〔欣賞〕

    春天的暗暝，著是短短的一刻時間，嘛是價值千金。因為即時的花蕊上清芳，月娘嘛有一種朦朧的嫷。樓臺四周鬧熱的歌聲參管絃聲已經漸漸來消失，而且埕斗的韆鞦也寂靜無人，表示夜色已經深沈了。

    蘇東坡一生時常遭受著貶放，養成伊個人一種通達的人生觀，即款的個性表現佇詩的氣象因此非常曠闊，所以完成真濟不朽(put4-hiu2)的詩詞。即首─春宵是其中的一例。

    這是一首「即興性」的詩作，詩人透過靈敏的感覺，掠(liah8)著春宵的可貴，用一種顯明的色彩寫出：「春宵一刻值千金」，將短短的時間佮千金結合，尤其是佇芳花、朦朧的月的氣氛之下，「春宵」變成一種，千載難逢的機會佮貴重的物件。後兩句描寫夜深的時，夜愈深花愈清芳，月娘也愈嫷，這是詩人所欣羨(him1-sian7)的時間佮景致。

---

088

城東早春                   楊巨源  sing² tong¹ co² chun¹  ioonn⁵-ku⁷-guan⁵

詩家清景在新春，        si¹ ka¹ ching¹ king² cai⁷ sin¹ chun¹

綠柳纔黃半未勻。        liok⁸ liu² chai⁵ hong⁵ puan³ bi⁷ un⁵

若待上林花似錦，        ciok⁸ thai⁷ siong⁷ lim⁵ hua¹ su⁷ kim²

出門俱是看花人。         cht⁴ bun⁵ ku⁷ si⁷ khan³ hua¹ jin⁵

 

〔欣賞〕

    詩人所喜愛描寫的清朗美麗的景色，攏佇新春的時候，青翠的柳樹，拄拄吐出嫩黃(cing2-hng5)的細芽(ge5)猶未完全整齊。假使卜等待上林苑的花開甲像錦繡般的燦爛才卜欣賞。到迄東(tang1)時，出門的攏爭作伙卜觀賞看花的人。

    即首詩表面看起--來，只不過是描寫詩人與眾不同，能獨具慧眼，欣賞新春未成熟、定型的景色，而一般人干礁會曉看鬧熱而已，對一種已成型的美景隨聲附和。但是若進一步來看，此詩別有意，當一個英雄猶未叱吒風雲的時，伊是寂寞的，著像黃色的柳芽，並無多少人會欣賞伊，此時須要有像詩人迄款敏感的人，才發現會著。所謂「慧眼識英雄」，「伯樂識千里馬」，所以有成就的人，必須愛會曉觀察入微，發他人未發，這才是創見發明。詩除了怡情外，伊嘛啟發著讀者的靈性。

---

089

春夜                          王安石  chun¹ ia⁷  ong⁵-an¹-sik⁸

金爐香盡漏聲殘，         kim¹ loo⁵ hiong¹ cin⁷ loo⁷ sing¹ can⁵

翦翦輕風陣陣寒。         cian² cian² khing¹ hong¹ tin⁷ tin⁷ han⁵

春色惱人眠不得，         chun¹ sik⁴ nau² jin⁵ bian⁵ put⁴ tik⁴

月移花影上欄杆。         guat⁸ i⁵ hua¹ ing² siong⁷ lan⁷ kan¹

〔欣賞〕

    金爐的香料已經燒盡啦，計時滴漏的水聲也漸漸消失，即時輕風微微吹來，煞予我感覺陣陣(cun7)的寒意。因為春天的景色，更加使人煩惱而且睏)袂去，啥知月娘偏偏閣共(ka7)花影移照到欄杆上。

    春天本是一個使人喜悅的季節，但是當(tng1)心有所思的時陣，伊不但袂予人愉快，甚至往往閣增加有情人的鬱卒而已。

    此詩對春的感傷是逶(ui3)夜色產生的，詩人寂寞無伴，佇床中翻來覆去，輾轉難眠。頭兩句「漏聲殘」、「剪剪輕風」，是以聲覺方式，來表現作者半暝夜深，對聲音的敏感。「春色」、「花影」這是以「視覺」方式，來表現花影作伴的寂寞。孤枕難眠的情景，自在不言中。

    即首詩用的韻跤是「平聲陽韻─殘(can5)、寒(han5)、杆(kan1)」，朗誦起--來，聲調宏亮，會使人目珠(睭)起大蕊，拄好佮「孤枕難眠」的氣氛相合，李白的「靜夜思」仝款有即款的意境，由此可見押韻佮氣氛是有密切的關係。

　

---

194

曲江對酒其一                 杜甫  khiok⁴ kang¹ tui³ ciu²  too⁷-hu²

一片花飛減卻春，                    it⁴ phian³ hua¹ hui¹ kiam² khiok⁴ chun¹

風飄萬點正愁人。                    hong¹ phiau¹ ban⁷ tiam² cing³ chiu⁵ jin⁵

且看欲盡花經眼，                    chiann² khan¹ iok⁸ cin⁷ hua¹ king¹ gan²

莫厭傷多酒入唇。                    bok⁸ iam³ siong¹to¹ ciu² jip⁸ tin⁵

江上小堂巢翡翠，                    kang¹ siong⁷ siau² tong⁵ cau⁵ hui¹ chui³

苑邊高塚臥麒麟。                    uan² pian¹ ko¹ thiong² go⁷ ki⁵ lin⁵

細推物理須行樂，                    se³ thui¹ but⁸ li² su¹ hing⁵ lok⁸

何用浮名絆此身。                    ho⁵ iong⁷ hu⁵ bing⁵ phuan³ chu² sin¹

〔欣賞〕

    一片(phinn3)一片的落花已經將春天的風光減褪(the3)，突然一陣大風使得萬點飛花飄落，所以令人傷感。暫且加看幾眼強卜凋零的落花，亦勿(mai3)因為傷過感傷對酒不飲。曲江上的小堂攏被翡翠鳥做了岫(siu7)，芙蓉苑邊的大墓干礁(kan1-ta1)申兩隻麒麟作伴，將萬物變化的道理斟酌想看覓(mai7)，得著的結論是人生愛「行樂」正當時，何必受著虛無不實的名聲來束縛家己。

    人佇遊春賞景的時，上容易被落花所感動，尤其佇困境消極悲觀的時刻，看著一片一片飄零的落花(lok8-hua1)，更加產生濟濟的感慨。杜甫佇肅宗至德二年十月，因為上疏為房琯伸冤，仵逆了皇上，所以被放逐為華州司功參軍。為了卜消愁解悶，所以日日到曲江來遊賞飲酒。

    歸首詩表達了詩人一種頓悟，不但花會凋零，人會衰老，萬物攏會衰落，這是大自然不變的法則，人生既然如此，又何必費盡心機追求浮名，違背做人的本性，所以「及時行樂」，予家己「天天開心」，才是真正的人生。

---

　

221

自詠                           韓愈  cu⁷ ing⁷  han⁵-u²

一封朝奏九重天，         it⁴ hong¹ tiau⁵ coo³ kiu² tiong⁵ thian¹

夕貶潮陽路八千。         sik⁸ pian² tiau⁵ iong⁵ loo⁷ pat⁴ chian¹

本為聖朝除弊政，         pun² ui⁷ sing³ tiau⁵ tu⁵ pe³ cing³

敢將衰朽惜殘年。         kam² ciong¹ sue¹ hiu² sik⁴ can⁵ lian⁵

雲橫秦嶺家何在，         un⁵ hing⁵ cin⁵ ling² ka¹ ho⁵ cai⁷

雪擁藍關馬不前。         suat⁴ iong² lam⁵ kuan¹ bann² put⁴ cian⁵

知汝遠來應有意，         ti¹ lu² uan² lai⁵ ing¹iu² i³

好收吾骨瘴江邊。         hoonn² siu¹ goonn⁵ kut⁴ ciong³ kang¹ pian¹

〔欣賞〕

    佇一擺五更早朝的時，共皇上奏一封「諫(kan³)迎佛骨表」的奏章，想袂到觸怒著皇上，當日暗時馬上被降官調職，流放到八千里路外的潮州。我一心想卜(beh⁴)為國家(聖朝)除掉無合理的政事，所以並毋是因為家己的老朽(noo²-hiu³)，才無惜風燭殘年的生命。回頭一看，只見終南山被烏雲遮稠咧，已經分袂清故鄉佇啥乜所在？即時的藍關又是大雪紛飛，騎馬也因此行袂開跤。我知影汝逶遠路的所在趕來接我，一定是有啥乜用意的， 可能是驚我死佇世界(si³-ke³)有瘴癘之氣的江邊，準備來為我收屍抾骨頭。

    即首詩是韓愈上「諫(kan³)迎佛骨表」被貶做潮州刺使，途中遇著姪孫韓湘子，感傷之餘所寫的作品。詩人一片忠心耿耿，所以明明知影上表，會觸怒皇上，被降調下放，但是猶原在所不惜，表現出知識份子，為真理的付出佮犧牲。雖然面對惡劣的環境的時，嘛會有軟弱的時陣，所以詩中寫出茫茫大海毋知家己身在何處？大雪紛飛，閣更加淒涼的氣氛。但是佇親情的關懷之下，予伊猶原有勇氣繼續向前行！