序文

千家詩是過去囡仔(ghìn-à)佇書學仔所朗誦、唸讀「近體詩」的教材之一。即本詩集原本是宋朝劉克莊(字後村)分門別類選輯唐朝、宋朝詩人的詩作，號做「唐宋千家詩選」，總共有二十二卷，一般通稱叫「千家詩」。詩作所選的攏是「近體詩」，包括「五言絕句」、「五言律詩」、、「七言絕句」「七言律詩」等四種。即本詩集內容淺白易解，是過去「書學仔」用來作啟蒙的讀物，真受著歡迎佮重視。目前咱所看著的版本內容，多數由明朝的人增刪，已經毋是原本的內容，一般講法是由謝枋得選輯，王相注解。

    俗語講：「熟讀唐詩三百首，袂曉作詩嘛會曉吟。」即句話表達出，詩是咱抒發感情的重要工具。但是唐詩三百詩所選輯的詩作，除了五、七言的「絕仔」佮「律仔」以外，另外閣有五、七言古詩、五、七言樂府等詩體，即二種體裁的詩作，往往內容、篇幅傷長、傷濟，無適合一般人佮兒童的朗誦佮吟唱。但是千家詩干礁有五、七言律、絕詩作，並且選入大量宋朝詩人的作品，佮一小部分明體的作品。佇時間方面「千家詩」出冊的時間比「唐詩三百首」閣卡早，所以兩種比較起--來，千家詩卡多樣化佮豐富性，莫怪幾仔百年來，攏足受著讀者的喜愛。

    孔子公講：「詩可以興(抒發意志)，可以觀(考察得失)，可以群(交友結群)，可以怨(內心不平)」。伊閣講：「不學詩，無以言。」可見「詩」對咱日常生活待人處事佮陶冶性情等方面的影響真大。

    「台語」(前身是閩南語、河洛語)被公認是保留古漢語卡完整的方言，尤是是伊的「讀書音(又稱孔子白、文言音)」佮唐朝的官話有密切的關係，另外保留了完整「入聲字」─短促急收藏的特色，所以古詩若用「讀書音」、「入聲字」的特色，尤其配合台語八聲七調的音樂性，來朗誦、吟唱，會有抑、揚、頓、挫的效果，聽起--來，那(nà)像天籟一般，感覺真爽快嘛真心適，所以身為台灣人會曉講台灣話，是一件足榮幸、足光彩的事志(dāi-zi)，身為台灣人，咱愛將「台語之美」共(gā)伊發揚光大。

    目前政府、民間攏真重視本土文化，並且一再呼籲「搶救母語」的重要性。阮感覺若會凍將過去書學仔所讀的「千家詩」、「昔時賢文」、「千金譜」、「台灣三字經」等啟蒙的讀物，用母語來發音，我相信對咱母語教育的釘根功課(kang-gue)有足有的幫贊。即本「羅馬版─千家詩」是佇即種理念之下來完成的。